شەفەق نیوز/ وەڕیەوبەرایەتی پولیس پارێزگای دهۆک، ئمڕوو پەنجشەممە، خەوەردا لە دەسگیرکردن زیاتر لە ٢٠٠ کەس وە توومەت قوماربازی، و هەفت بنکەیش ئەرا توومارکردن چەک بیمووڵەت واز کرد، ک  ئەو چەکەیلە تەنیا یەک مانگ ئەرا توومارکردنیان مەنیە، وەگورەی ئەو دەرفەتە ک وەزارەت ناوخۆیی هەرێم کوردستان دادەی.

عەقید هێمن سلێمان قسەکەر پولیس ئەرا رووژنامەنویسەیل وت: بنکە و نویسینگەیل پولیس دژەتاوان ٨٤ سکاڵا توومارکردنە، و لە ئەنجامی زیاتر لە ٢٠٠ کەس وە توومەت قوماربازی دەسگیر کریان.

وتیش؛ لە ساڵ ٢٠٢٢، ١٨١ سکاڵا توومار کریا، و لەبان ئەوە هیزەیل ئەمنی ٣٠٠ کەس وە توومەت تاوانەیل قوماربازی دەسگیر کریام، و دووپات کرد ک ئی هەڵمەتەیلە وەلایەن وەڕیوبەرایەتی پولیس وە دەسمیەتی دادگای نەهیشتن تاوانەیل دهۆک وەردەوامە.

 لەباوەت توومارکردن چەک بیمووڵەت قسەکەر پولیس دهۆک وت: وەزارەت ناوخوەی هەرێم کوردستان، دویەکە بڕیار وازکردن ٤٨ بنکەیتر ئەرا توومارکردن چەک بی مووڵەت لە گشت ناوچەیل هەرێم کوردستان واز کرد، وەگەرد هەفت بنکە لە پارێزگای دهۆک، لەوانە بنکەی پولیس خەبات و بنکەی پولیس نەورۆز و برایەتی و دۆمیز و شیلادزێ و کلاکچی و بنکەی پولیس روڤیا.

 سلێمان وتیش: تەنیا یەک مانگ ئەرا توومارکردن چەک بیمووڵەت مەنیە، و هەر کەسیگ چەک لەو بنکەیلە توومار نەکەێد، چەکەگەی نا یاساییە، و ئەوەسا ریکارەیل یاسایی وەرانەوەری جیوەجی کریەێد، و سزای زیندانی لە یەک تا سێ ساڵ دریەێد، وەگەرد باجیگ پویلی لە دوو مەلیۆن تا پەنج مەلیۆن دینار.