گورزیگ ئیرانی لەبان باکوور هەولێر ئەرا سێیەم جارە وەماوەی ٢٤ سەعات
شەفەق نیوز/ تووپەیل سوپای ئیران، ئمڕوو دووشەممە، دووارە پەلامار ناحیەی سیدەکان لە ئیدارەی ناوچەی سەروەخوەیی سۆران لە باکوور شار هەولێر پایتەخت هەرێم کوردستان دان، و یەیش ئەرا سێیەم جارە وەماوەی ٢٤ سەعات.
ئیحسان چەلەبی وەڕیەوبەر ناحیەی سیدەکان ئەرا ئاژانس شەفەق نیوز وت: لە شەوکی زویەو تووپ ئیرانی دەسکردیەسە تووپواران چەن ناوچەیگ لە ناحیەگە.
وتیش: تووپوارانەگە بڕبڕە، ک هەر ماوەی جاریگ پەلامار ئی ناوچەیلە دەن.
دویەکە یەکشەممەیش، تووپ ئیران دووارە پەلامار ناحیەی سیدەکان دا، وەبی کەفتن زەخمدارییگ.
وەرجەیە وەڕیەوبەر ناحیەگە ئەرا ئاژانسمان وتیە، تووپ ئیران دویەکە پەلامار ناوچەی بریزین وهۆرنی لە سیدەکان دا، زەرەدەیل گیانی لەلی نەکفتگە.
سوپای پاسدران ئیران، دویەکە، خوەی کردە خاوەن ئەو تووپوارانە لە ناوچەی سەروەخوەیی سۆران لە هەرێم کوردستان.
کەناڵ عالەم ئیرانی لە زوان سوپای پاسدران وت: پەلامار گرووپەیلیگ تیرۆری وە تووپ دانە لە باکوور عراق، دویای تەقەلایان ئەرا وەناوهاوردن چەک وەرەو شارەیل سنووری تا ئاژاوە لە ئیران بنەنەو.
