کوردستان: پشوو رووژ یەکشەممە هەرێم نیەگرێدەو
شەفەق نیوز/ هەرچەن حکومەت فیدراڵی رووژ یەکشەممە 16ی ئادار کردە پشوو فەرمی، ئەرا ساڵیاد بمبارانکردن هەڵەبجە وە چەک کیمیایی، حکومەت کوردستان دووپات کرد کە ئی پشووەیلە هەرێم نیگرنەو.
حکومەت هەرێم کوردستان لە بەیاننامەیگ رەسیە ئاژانس شەفەق نیوز وت: پشوو و بوونەیل فەرمی لە خشتەی فەرمی خوەی دیاری کریانە، و هەر ئەو پشوو و بوونەیلە جویر خوەیان میننر و هویچ ئاڵشتکارییگ لەبانیان نییە، مەگەر پەرلەمان کوردستان، وەگورەی دەسەڵات خوەی، بڕیار دووارە نووڕین بەێد یا بڕیار نوویگ لەلی دەرکەێد.
یەیش لە وەختیگ تیەێد کە یاسای پشووەیل فەرمی لە عراق کە پارەکە وەفەرمی لە پەرلەمان عراق دەرچگ، ئویشێد؛ رووژ 16ی ئادار ساڵیاد تاوانەیل بەعسە لەبان گەل عراقی لە هەڵەبجە و ئەنفال، و بڕە قەورسانەیل، و راپەڕین شەعبانیر و کوشتن زانا و حزبەیل، و لە گشت عراق پشوو فەرمییە.
لە 16ی ئادار 1988، دەسەڵات بەعس شار هەڵەبجە وە چەک کیمیایی بمباران کرد، کە بویە هوکار کوشیان نزیکەی پەنج هەزار کەس، و زەخمداری نزیکەی دە هەزار کەس ترەک.
