پڕ و کوڵ و تامدار.. وەرز چنین نووبەرەی بامیەی کوردی لە شارەزوور
شەفەق نیوز/ بامیە، یەکیگە لە سەوزە گرنگەیل ک خوان خواردن عراقی پڕەو کەێد، وەتایبەت لە هەرێم کوردستان، لەوەر سوودەیل فرەی و نام خوەشی، وەتایبەت لە وەرز نوو بەرەگەی.
وەرز چنین نوو بەرەی بامبە لە ناوچەیل شارەزوور لە دویادویای مانگ ئایار تا دویادویای مانگ تەشرین یەکەم دەس وەپی کرد.
بامبە کوردیەکە وە کوڵی وپڕی ناسریاگە، و لە ناوچەیل باشوور دریژ و باریکە ک وەپی ئویشن (خسێناویە یا بەترە) و نرخەیل نووبەرەی بامیە گرانە، ئیجا کەم کەم ئەرزانەو بوود.
کشاورز پیشتیوان عومەر لە مەوقەی بامیە چنین لەناو بووسانەگەی ئویشێد؛ وەرز چنین نووبەرەی بامیە لە ناوچەیل شارەزوور دەس وەپیکرد، و ئمساڵ وەگورەی ساڵەیل گوزەیشتە خاس بوی، وەلێ نرخەیل کەمیگ بەرزەو بوین، ئەوەیش وە هووکار بەرزەوبوین نرخ پەیین و توێەم و چشتەیل کشتوکاڵی.
عومەر دیاری کەێد ک ئیمە وە نرخ ٥ هەزار ئەرا یەک کێلوگڕام فرووشیمنەی بازاڕەگە، چوینکە بامیەی کوردی جیوازە وە تامە خوەشەگەی.
جی باسە، وەزارەت کشتوکاڵی لە حکومەت هەرێم کوردستان، قەیەغەی هاوردەی بامبە لە دەوڵەتەیل هاوسا کرد، تا مقەیەتی بەرهەمەیل ناوخۆ بکەێد.
