وێنە.. کوردستان زەیتوون چنێد و خوازێد بڕەسێدە پێشکەفتن لە هەناردەی روینەگەی
شەفەق نیوز/ لە وەرز زەیتون چنین وەگەرد کۆتایی وەرز پاییز و هاتن وەرز زمسان لە هەرێم کوردستان ، ک لەی مەوقە کارەگایل دراوردن روین ئی بەر پیرووزە لەلای ئاینە ئاسمانیەگان دەسکەێدەپی، ک لقەگەی سومبل ئاشتیە لە جهان.
سڵیمان شێخو ئەندازیار کشتوکاڵی و خاوەن یەکەم کارەگای نووە ئەرا روین دراوردن زەیتوون لە هەولێر، ک وەرجە چەن ساڵیگ دامەزرانەی، ئووشێد: وەرجە یەک هەفتە دەسکردنە وەکارخستن کارەگای نوویگ تر لە قەزای شێخان لە پارێزگای دهۆک.
لە قسەیلی ئەرا ئاژانس شەفەق نیوز ئووشێد: توانای کارکردن کارەگا نووەگە لە دهۆک رووژانە ١٠٠ تەن لە زەیتوونە، تا وە ماوی ٢٤ ساعەت بکریەێد روین ، و توانای کارەگای هەولێر رووژانە رەسێدە ٥٠ تەن.
هەردوگ کارەگاگە وەسێ نۆڕە کارکەن چوونکە فرە لە کشاورزەگان خوازن زەیتووتیان بکەنە روین.
خاوەن دوو کارەگاگە باخیگ زەیتوون دیرێد نزیکەی ٤٢ هەزار دار هاناوی.
ئووشێد؛ خوازم باخیگ تر ئامادە بکەم، و لە پارێزگای دهۆک دەسکردمەسە پی، ک نزیکەی ١٠٠هەزار دار گرێد.
لەلای خوەییش حەمەد حسێن قەسەکەر وەناو وەزارەت کشتوکاڵی لە هەرێم ئەرا ئاژانس شەفەق نیوز ئووشێد؛ لە ساڵ ٢٠٠٨ تا ئیسە حکومەت هەرێم کوردستان گرنگی داگەسە کاڵین زەیتوون، و خوازیمن هەرێم کوردستان بوودە هەناردەکار سەرەکییگ لە زەیتوون و روینەگەی.
هەمیش ئووشێد؛ لە ساڵەیل گوزەیشتە سەدان هەزار دار لە عەفرین سوریا و لە ئیسپانیا هاوردیمنە.
دەربارەی ژمارەی دارەیل زەیتوون لە هەرێم، حسێن ئووشێد؛ ئیسە ئامار ووردیگ نەیریمن، بەڵکم توێنیمن بووشیمن ک دارەیل زەیتوون لە هەرێم کوردستان رەسینەسە دەور چوار مەلیۆن دار، دویای ئەوە ک لە ٢٠٠٨ ژمارەیان لە دووسەد هەزار زیاتر نەوی.
حسێن هەمیش ئووشێد؛ لە ماوەی ساڵەیل گوزەیشتە ئامێرەیل ئاویاری و تکەئاو دایمنە کشاورزەگان، و دایەگان ئەرایا دابین کردیمن، وئیسە هەفت کارەگای بەرهەمکردن روین زەیتوون لە هەرێم هەس، وهیمان کار ئەرا وەکارخستن کارەگایلیگ تر وەردەوامە.
حکومەت هەرێم کوردستان وە هاوکاری حکومەت ئیتالیا دەسکردە کردنەوەی خولەیلیگ ئەرا کشاورزەگان وەئامانج بەرزەوکردن توانایل زانستییان لە چین وەڕێۆبردن باخەیل زەیتوون و کاڵینیان.
