وینە.. واران شمارەی گەشتیارەیل لە دوکان کەمەو کەێد و سەدانیش روی وەرەو سەرتەک کەن
پەیامنێر ئاژانس شەفەق نیوز لە سلێمانی وت: کەشوهەوای واراناوی لە ئیوارەی دویەکە، وەشیوەی گەورەیگ سەردان گەشتیارەیل ئەرا سەیرانگای دوکان لە شەوەکی جەژن نەورووز ئی ساڵە کەمەو کرد.
وتیش: سەیرانگای دووکان یەکیگە لە گرنگترین ئەو سەیرانگایلە ک گەشتیارەیل لە جەژن و بوونەیل روی وەپی کەن، وەتایبەت لە جەژن نەورووز، وەخاتر رەنگینی سرووشتەگەی.
هەرلیوا، وەڕیەوبەرایەتی گەشتوگوزاری خانەقین سەروە هەرێم کوردستان، دووپات کرد ک سەدان لە گەشتیارەیل و گرووپەیل گەشتیاری هاتنە ناوچەیل دەورگرد خانەقین وەرەو سنوور کەلار ئەرا ئاهەنگ نەورروز.
سەمیر سەردار وەڕیەوبەر ئاژانسەگە ئەرا ئاژانس شەفەق نیوز وت: سەدان لە گەشتیارەیل و گرووپەیل گەشتیاری روی وەرەو سەرتەک کردن لە دەورگرد قەزای خانەقین ئەرا ئاهەنگ نەورروز، ئیجا روی وەرەو ناوچەیل هەرێم کوردستان کەن، وتیش: نزیکەی ١٠٠٠ گەشتیار لە دەورگرد خانەقین روی وەرەو ناوچەیل هەرێم کردن.
سەردار دیاری کرد ک فەرمانگەگەی دەسکردە پلان دایین مووڵەت ئەرا ئەو گەشتیارەیلە ک روی وەرەو ناو هەرێم کوردستان کەن، وە ریکارەیل ئاسانیگ وەبی ریگری وەڕیەو چوود، وتیش؛ کەشوهەوای وەهار و نزیکبوین مانگ رەمەزان شمارەی گەشتیارەیل لە دەورگرد خانەقین و سنوور کوردستان زیایەو کرد.
وتیش: هەرچەن وارانە، باوجی جویلەی گەشتیاری و ئاهەنگەیل لە دەورگرد خانەقین و سنوور ناوچەیل کوردستان وەردەوامە.
