وینە و ڤیدیۆ.. هاووڵاتیەیل عەرەو دەسنەنە بان زەوی کورد لە کەرکوک
شەفەق نیوز/ دیلان غەفورخانمە پەلەمانتار عراقی، ئمڕوو یەکشەممە، ئاشکراکرد لە تەقلای هاوڵاتیەیلیگ عەرەو ئەرا دەسناین لەبان زەویلیگ ک کورد خاوەنیە لە پارێزگای کەرکوک، وئاماژەدا ک سەدام حسێن وەبی ماڤ دابەشی کردگە.
غەفور ئەرا ئاژانس شەفەق نیوز وت: کوردەگان لە کەرکوک لە زوەیەو بەش زەوی دیرن لە ناوچەیل ناوبەین ری دوزخورماتو و قەزای داقوق لە ناوچەی حەفتەغار لە پارێزگاگە، لەوەخت بەعس وەبی ماڤیگ دابەشکریانە له‌بان هاووڵاتیە عەرەبەگان. ودیاری کرد ک ١٢٠ گریەبەس ئەو زەویلە نووەو کریا ئەرا هاووڵاتیە عەرەبەگان وگورەی یاسای ئەو ناوچەیلە، و ئیجوور گریەبەسە وسیاگە و یاسایی نیە و بایەسە ئی یاسا بووسیەێد.
غەفور باس لە خەفەت خوەی کرد ک راکان سەعید پارێزگار کەرکوک وسیاس وەل عەرەوەگان ک لەدەیشتەو هاتنە، و فرەیان سودمەنبوین لە مادەی ١٤٠ و قەرەبوو خوەیان وەرگردنە وئیسە هاتنەو داوای زەوی کەن. غەفور ئاماژەدا ک خەوردار عەرەوەگان کریا تا بچەنەو ئەرا ئەو شونە ک لەلیەو هاتن، و یەک رووژ دەرفەت دانە پیان وەنە کوردەگان لەناو ودەیشت پارێزگای کەرکوک دەرچنە خۆپیشاندان.
غەفور ک خوەی نوێنەر یەکێتی نیشتمانی کوردستانە لە کەرکوک، داوا لە فەرماندەی ئۆپراسیۆنەگان کەرکوک و لایەنە پەیوەندیدارەگان لە حکومەت کرد دەسوەردان بکەن. پارچە ڤیدیۆیگ نشان دەێد ، دەسوەشانن و تەقەکردن لە لایەن بڕیگ هاووڵاتی عەرەو لە هەوڵدانیگ تا دەسبنەنە بان زەوەیلیگ سەروە کوردە، و دەوریەی پۆلیس لە نزیکیان جوور تەماشاکەر وسیاگە وەبی دەسوەردانیگ ئەرا کۆتایی هاوردن وە روی وەرویبوینەگە.
