وێنە و ڤیدیۆ.. هەولێر کەڵەکەی شۊن لافاوەیلە ماڵێد و مینەی دوو بیسەروشۊن کەێد
شەفەق نیوز/ وەرگری شارستانی لە شار هەولێر پایتەخت هەرێم کوردستان، ئمڕوو دووشەممە، راگەیان وەردەوامی لە مینەکردن کوورپە و شوانیگ لە لافاوەیل هەفتەی گوزەشتە لە شارەگە گوما بۊینە.
سەرکەوت کارش قسەکەر وەرگری شارستانی لە هەولێر ئەرا ئاژانس شەفەق نیوز وت: ئمڕوو رەسیمنە پشت ئاوای مام زاوا لە باشوور هەولێر وە بەشداریکردن ٢٢٠ کەس وەمینەی تەرم کوورپە و شوانە گەنجەگە، باوجی تا ئیسە پەیایان نەکردیمنە.
وتیش: هیمان مینەکردن وەردەوامە لەلایەن تیمەیل وەرگری شارستانی لەو شۊنەیلەگ لافاوەیلە وەپیا رەد بۊنە، ک رووژ جومعەی گوزەشتە هەولێر گردەوەر.
لەلای خوەییش، ساسان عەونی وەزیر شارەوانی لە حکومەت هەرێم کوردستان راگەیان زەرەدەیلە رەسینە زیاتر لە ٢١ ملیار دینار عراقی.
عەونی ئەرا ئاژانس شەفەق نیوز وت: دەسەیلیگ ئەرا هەڵسەنگاندن زەرەدەیلە ئامادە کردیمن، و وەگورەی راپۆرتەیل فەرمییان زەرەدەیلە لە ٢١ ملیار دینار عراقی زیاترە، و یەیشە بار سەنگینیگ خەێدە بان حکومەت هەرێم کوردستان، ئەراوە ئومید لە حکومەت فیدراڵی خوازیمن بوودجەیگ تایبەت ئەرا خزمەتگوزاری تەرخان بکەێف و وەزۊیترین دەرفەت دەسمیەتیمان بەێد.
وەزیرەگە وتیش: کار لە پاکەوکردن ماڵ و جادەیلە هیمان وەردەوامە وەگەرد پاکەوکردن جوو ئاوەیلە ئەرا بانان وارانیگ تر و نواگردن لافاوەیلیگ تر لە شارەگە.
لەلای خوەییش، محمد شوکری محمد سەعید سەرۆک دەزگای بەرهەمهاوردن لە هەرێم کوردستان وت: تا ئیسە تۊنستن زیاتر لە یەک ملیار و ٣٠٠ مەلیۆن دینار گردەو بکەن، دۊیای ئەو هەڵمەتە ک پیرەکە لەلی راگەیانن، ئەرا وەرگرد هاوکاری دارایی لە بەرهەمهاورەیل و خەیرخوازەیل لە هەرێم کوردستان.
