وینە.. نمازخوەنین و خاکسپاردن رەحمەتی یەدولڵا فەیلی لە هەولێر
شەفەق نیوز/ لە شار هەولێر پایتەخت هەرێم کوردستان، ئمڕوو سێشەممە، رسوومەیل نمازخوەنین و وەخاسکسپاردن رەحمەتی یەدولڵا فەیلی وەزیر وەرین لە حکومەت هەرێم کوردستان و سەرکردە لە پارتی دیموکراتی کوردستان وەڕیەو چگ.
پەیامنێر ئاژانس شەفەق نيوز وت: رسوومەیل وە ئامادەبوین ئومێد خۆشناو پاریزگار هەولێر، و عەلی حسێن فەیلی سەرۆک ئەنجومەن ئیدارە دامەزراو شەفەق نیوز ئەرا روشنهویری و راگەیانن کورد فەیلی، و ئەحمەد کانی وەرپرس لق دویەم لە پارتی دیموکراتی کوردستان، و عەلی فەیلی راویژکار بارەگای بارزانی، و بڕیگ لە کەسیایەتیەیل سیاسی و روشنهویری و کۆمەڵایەتی و دەمچەرمگەیل کورد فەیلی و چینەیلیگتر لە هەولێر وەڕیەو چگ.
ئامادەبویەیل نماز مردگ ئەرا گیان رەحمەتی لە مزگەفت "الشفاء" خوەنستن، تا ئیجا روی وەرەو قەورسان شێخ ئەحمەد بکەن لە شار هەولێر، ولەورا لە دویاترین ماوای بنریەێدە خاک.
یەدولڵا فەیلی، دویەشەو دووشەممە، لە تەمەن ٨٨ ساڵی، لە شار هەولێر پایتەخت هەرێم کوردستان دویاکووچی کرد.
فەیلی دویای خراوبوین رەوش تەندروسیی خریا ژیر چەودیری هویرد لە خەسەخانەی رزگاری لە هەولێر، وەلێ گیانی لەدەسدا.
عەبدولکەریم موڕاد فەتحولڵا ک ناسیایە وە یەدولڵا فەیلی، لە ساڵ ١٩٣٤ لە بەغداد پایتەخت لەداڵگبویە، لە ئامادەیی بازرگانی دەرچگ، لە ساڵ ١٩٥٠ کەفتە رزەیل پارتی دیموکراتی کوردستان، وبویە یەکەم مەندووب یەکێتی گەنجەیل دیموکراتی کوردستانی، و لە ساڵ ١٩٥٣ لە دامەزرەیلی بوی، و لە ساڵ ١٩٥٧ بویە وەرپرس دەسەی خۆجێی پارت دیموکراتی کوردستان لە بەغداد.
لە ساڵ ١٩٥٩ ڕەحمەتی بویە مەندووب کۆنفرانس دویەم لە پارتی دیموکراتی کوردستان، و لە کۆنگرەی پەنجەم ئەرا پارتی دیموکراتی کوردستان لە ساڵ ١٩٦٠ جویر ئەندام دەسەی وەشکین و چەودیریکردن باڵا و یاوەر لق پەنج حزبەگە هەڵوژیا، و لە ساڵ ١٩٦٣ وەدەس "حەرەس قەومی" دەسگیر کریا، و کەفتە وەر شکەنجەی سەختیگ ئەرا مردن، ک لەو مەوقە وە پاڵەوان کوردستان ناسریا، و لە ساڵ ١٩٦٤ لە کۆنگرەی شەشەم حزبەگە بویە ئەندام دەسەی مەرکەزی.
لە ساڵ ١٩٦٥ بویە وەرپرس لق پەنج و ئەندام نویسینگەی سیاسی حزبەگە، و لە ساڵ ١٩٧٢ پۆست سەرۆک یەکێتی گەنجەیل دیموکراتی کوردستانی لە کۆنگرەی دویەمی وەگرد.
رەحمەتی لە ساڵ ٢٠٠١ لە کابینەی چوارەم حکومەت هەرێم کوردستان پۆست وەزیر کاروبار هەرێم وەرگرد.
