وێنە.. قونسوڵ ئەمریکا پەیامیگ لەناو چێشتخانەیگ لە هەولێر کل کەێد

شەفەق نیوز/ قونسڵ گشتی ئەمریکا لە هەولێر،  وەیاوەری پارێزگار ئومێد خۆشناو، چینە گەردین و لەناو یەکیگ لە چێشتخانەیل شارەگە نانیان خواردن، ئەوەیش دۊای چەن ساعاتیگ لەو پەلامار مووشەکیە لەبان هەرێم کوردستان ک سوپای پاسداران ئیران خوەی کردە خاوەنی. 

لە بەیاننامیگ رەسیە ئاژانس شەفەق نیوز وت: لە مەوقەی خواردنەگە،  هەردوگ لایەنەگە دووپات لەبان پەیوەندیە دووانیە قایمەیلە لەناوبەین حکومەت هەرێم کوردستان و ئەمریکا کردن، لە خود وەختەگە شەرمەزار ئەو پالامار ترسۆکانە کردن ک دۊەشەو لەبان هەولێر کریا.    

وەگورەی بەیاننامەگە،  پارێزگار هەولێر دووپات کرد ک ئاسایش و ئارامی شارەگە وەیجۊر کارەیلیگ خراو نێکریەێد، وتیش: هەولێر سەر لەنوای هۊچ کردەوەیگ تیرۆری و ترسۆکانە نێچەمنێد،  و هەمیشە هەکاتی قڵاگەی سەربەرز مینێد.