وینە.. شاندیگ لە هەرێم کوردستان وە سەرۆکایەتی نێچیروان بارزانی لە پرسەی سەرۆک ئیران بەشداری کەێد
2024-05-22T14:11:51+00:00
شەفەق نیوز/ شاندیگ پایەبەرز لە حکومەت هەرێم کوردستان، وە سەرۆکایەتی نێچیروان بارزانی سەرۆک هەرێم کوردستان، ئمڕوو چوارشەممە، لە ماڵئاواییکردن ئیبراهیم رەئیسی سەرۆک ئیران بەشداری کرد، کە وە ئامادەبوین ناودەوڵەتی گەورەیگ لە تەهران پایتەخت وەڕیەو چوود.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان ئەوەسا سەردان ئیران کەێد ئەرا بەشداریکردن لە پرسەی رەحمەتی ئیبراهیم رەئیسی.
شاندەگە وە سەرۆکایەتی سەرۆک نێچیروان بارزانی، هەرلە مەسروور بارزانی سەرۆک حکومەت هەرێم کوردستان، و موستەفا سەید قادر جیگر سەرۆک هەرێم، و قوباد تاڵەبانی جیگر سەرۆک حکومەت هەرێم، و ڕێبەر ئەحمەد وەزیر ناوخۆی هەرێم کوردستان هاتە ناو ئەو شاندە کە بەشداری لە پرسەی سەرۆک ئیران کەێد.
