وینە.. ئاهەنگ و ریپیوان گەورەیگ وەبوونەی جەژن ئەکیتو لە دهۆک

پەیامنێر ئاژانس شەفەق نیوز وت: هەزاران مەسیحی ریپیوان گەورەیگ و ئاهەنگ جەماوەری فراوانیگ کردن، ک لە ناوەند کەلتوری ئاشووری لەناو شارەگە دەسوەپی کرد تا رەسیە دووڵ دهۆک. 

لە یەک نیسان گشت ساڵیگ، ئاشووری و سریان و کلدان لە عراق و سوریایش، ئاهەنگ جەژن ئەکیتو کەن، ک هیمان هاناو رسووم و ویژدانیان، هەرچەن یە هەزاران ساڵ وەبانی رەد بویە.

ئەکیتو، یەکیگ لە کوینترین جەژنەیل ئاینیە لە شارستانی مرۆیی عراق. 

وەگورەی سەرچەوەیل میژووی، سەرەتای ئەو جەژنە کەفێدە ناوبەین چوارەم و پەنجەم هەزار وەرجە زایینی، و بڕیگ لە میژووناسەیل ئویشن: سۆمەری و سامیەیل لە سەردەم ئەریدۆ (٥٣٠٠ وەرجە زایین) ئاهەنگ وەی جەژنە کردنە، وەتایبەت لە باشوور عراق ک وە ناو "زاكموك Zag mug" ناسریاگە، و هەر ساڵیگ دوو گلە ئی ئاهەنگە کردیان، لە وەهار و لە پاییز.

لە زوان بابلی کوینە، ئی جەژنە ناوی  "ريش شاتم" بوی، ک واتەی (ریش) بوودە سەر، و واتەی (شاتم) ساڵە.

و لە زوان سۆرس ک تا ئیسە کیلدانیەیل لە عراق وەپی قسە کەن، (ریش شاتە) واتە سەر ساڵ.