وێنە.. پەیاکردن پارچەیل ئاسەواری ئەرا زیاتر لە ٤٠٠٠ ساڵ وەرجە زایینی لە هەولێر
شەفەق نیوز/ وەڕیەوبەرایەتی ئاسەواری لە پارێزگای هەولێر پایتەخت هەرێم کوردستان، ئمڕوو سێشەممە، راگەیان پەیاکردن پارچەیل ئاسەواری خەڕگین، تەمەنیان لە ٤٠٠٠ ساڵ وەرجە زایینی زیاترە.
نادر بەکر وەڕیەوبەر گشتی ئاسەواری لە هەولێر لە ککۆنگرەیگ رۆژنامەوانی و ئاژانس شەفەق نیوز ئامادەی بۊی وت: لە ماوەی نزیکەی دوو ساڵ تیمەیل مینەکردن بیگانە توانای هاتن وەرەو هەرێم کوردستان نەیاشتن، و خوەشەبختانە لەماوەی ئێی ساڵە چەن تیمیگ رەسینە هەرێم کوردستان ێەرا دووارە مینەکردن، لەلیان تیم ئیسپانی و یەکیگ ئەمریکی، و چەوەڕی دوو تەم بیگانەی تر کەیمن.
و دیاری کرد ک تیم زانکۆی پەرشەلۆنەی ئیسپانی وەگەرد تیم ووەڕیەوبەرایەتیەگەل، وە هاوکاری بەش ئاسەواری لە کۆلێژ ئاداب لە زانکۆی سەڵاحەددین ک لەناوچەی گردی لەشکر لە هەولێر تا ماوەی پەنج وەرز مینەکردن ئەنجام دان.
بەکر وتیش: ئیمە فرە وەی ئەنجامەیل مینەکردن وەرز شەشەم لەو ناوچە خوەشهاڵیمن، و دیاری کرد ک ناوچەی گردە لەشکر سەروە ناحیەی کەسنەزان لە قەزای سەهل هەولێر. _ لە باوەت ئەو پارچەیل خەڕگینە ل پەیا کریان، وەڕیەوبەر ئاسەواری هەولێر وت: کۆنترین سەردەم ک لەناوچەی گردی لەشکر ئەرا سەردەم شارستانی وەرکا گلەو خوەێد ک مێژووی رەسێدە نزیکەی ٤٣٠٠ ساڵ وەرجە زایینی.
کامیرایل ئاژانس شەفەق نیوز، ئەو پارچەیل ئاسەواریە، و هەمیش مەنزڵگەی کۆنەیگ لەو سەردەمە توومار کردن.
