وەگەرد نزیکەوبوین جەژنەیل نەورووز.. وەرگری شارستانی کوردستان رینماییەیل زویوەزوی دەرکەێد
شەفەق نیوز/ وەڕیەوبەرایەتی گشتی وەرگری شارستانی لە هەرێم کوردستان، ئمڕوو سێشەممەر بەیاننامەیگ دەرکرد لەناوی داوا لە هاوڵاتیەیل کرد پابەند وە رینمایەیل بیوەیی گشتی بوون، ئەرا دویرکەفتن لەو رویداوەیل و رخداریەیلە کە پەیوەندی وە وەرزەگە دیرێد، وەگەرد نزیکەوبوین جەژنەیل نەورووز، و سەرتای ساڵ کوردی نوو، کە وەگەرد کەشوهەوای وەهاری گونجیاگ وەگەرد سەوزەڵانی لە ئەنجام وارانوارین تیەێد.
وەڕیەوبەرایەتیەگە لە بەیانامەیگ رەسیە ئاژانس شەفەق نیوز وت: هاتن وەرز وەهار هیلێد کەسەیل فرەیگ بچنە سەیران لەناو سرووشت وە خوەشیکردن وە کەشوهەوای گونجیاگ، کە وریایی خوازێد ئەرا مقیەتیکردن بیوەیی گشتی.
بەیاننامەگە وتیش: وریایی لە رخداریەیل ئاگر دەمدان لە سەیران گرنگە، دووپاتیش کرد کە نەبایەس ئاگر لە شوینە هشکەیل نزیک گیا و دارەیل بکریەێدەو، وەگەرد دڵنیابوین لە کپەوکردنی وە تەواوی ئەرا نواگیریکردن لە هیزگردن ئاگر.
وەڕیەوبەرایەتیەگە هەمیش هوشداری لە رخداری رانین لەبان ئەو ریەیلە دا کە هاتێ لە ئەنجام وارانەیل وەهار سڕەو بوونر و داوا لە رانندەیل کرد وریا بوون و پابەند وە رینمایەیل هاتوچو بوون ئەرا دڵنیایی لە بیوەییان و بیوەیی ئەوەکان.
لەباوەت رخداریەیل ژینگەیی، بەیاننامەگە ئاگادار کرد ئەرا مقیەتیبوین لە زیندەوەرە ژەهردارەیل و رخدارەیل کە وەگەرد بەرزەوبوین پلەی گەرمی دەرکەفن، مەوقەی کەمپکردن یا سەیران لە ناوچەیل کویە، و دووپات لە گرنگی وریایی و جیوەجیکردن ریکارەیل مقیەتبوین کرد.
هەمیش وەڕیەوبەرایەتیەگە هوشداری دا لە هەڵگردن سزەمەنی لەناو چشتەیلیگ نەگونجیاگ، وەتایبەت لەناو بتوڵ ئاو لەوەر ئەو رخداریەیلە لەبان مناڵەیل هەس، کە جیاوازی ناوەین سزەمەنی و ئاو نیەکەن، کە ساڵانە رویداوەیلیگ کەلەمەدار لەلی بوودەو.
وەڕیەوبەرایەتیەگە لە کۆتایی بەیاننامەگەی وتیش: پابەندبوین وەی رینمایەیلە دەسمیەتی لە مسۆگەرکردن وەرز وەهار ئارامیگ ئەرا گشتی دەێد، و داوا لە هاوڵاتیەیل کرد وە وریایی وەرد گشت ئەو چشتەیلە رەفتار بکەن کە رخداری لەبان ژیان خوەیان و نزیکەیلیان دیرن.
