وەرپرسیگ حکومەتی: کەسیگ لە هەرێم کوردستان وە فەرمان دادوەری شکەنجە نەدریاگە
شەفەق نیوز/ هەماهەنکار تەمەیل ناودەوڵەتی لە حکومەت هەرێم کوردستان، دیندار زیباری، ئمڕوو یەکشەممە، وت: هەرێم کوردستان هویچ شکەنجەدانیگ وە فەرمان فورمی لە دەسەڵات دادوەری توومار نەکردیە.
ئەوەیش لە کۆنگرەیگ رووژنامەوانی لە هەولێر هات وە بوونەی رووژ ناودەوڵەتی ئەرا پشتگیریکردن لە قوربانیەیل شکەنجە، ک کەفێدە ١٦ مانگ حوزەیران لە گشت ساڵیگ.
زیباری لە کۆنگرەگە وت: گەل هەرێم کوردستان قوربانی بوی ئەرا ئەو شکەنجەیلە ک لە ساڵەیل گوزەشتە لە عراق وەفەرمان بوی، و باج گەورەیگ لە ئەنجام ئەنفال وزیندان سیاسی و شکەنجەیلیگ تر دا، وتیش: وەرپرسەیل ئیسە لە دەسەڵات هەرێم کوردستان قوربانی ئەو سیما بوین ک وەداخەو لە عراق وناوچەگە باو بوی.
ودووپات کرد ک قەیەغەکردن شکەنجە کاریگ گرنگە، وتیش: هەرێم کوردستان کار ئەرا داناین یاسایگ ئەرا نواگردن ئی سیما کەێد ک تەنیا بڕەیلیگ جیوەجیی نیەکەن، باوجی جاروباریش لە ئاست تاکانەیش کریەێد.
زیباری وتیش: دویای دەرکەفتن ریخریاگ داعش لە ساڵ ٣٠١٤ ریخریایلیگ ناودەوڵەتی توومەت هەرێم کوردستان کردن ک هیزە ئەمنیەیلە لە مەیدانەیل جەنگ لە مەوقەی رزگارکردن زەویەیل لەچنگ ریخریاگ داعش کارەیلیگ ناپووڕیاگ وەگەرد بەشیگ لە مەدەنیەیل کردنە، ودیاری کرد ک جواو ئەو راپۆرتەیلە دایمن، ودووپات لە پابەندی وە یاسای ناودەوڵەتی ئەرا ماف مرۆڤ کردیمن، وئیمە پابەندیمن وەپی لە ئاست ناوخوەیی و دەیشتی.
وەرپرس حکومەتی کوردستانی وتیش: عراق ئەندامیگ لە پەیماننامەی دژە شکەنجە بوی، وبایەت بوی ئی کارە کاریگەری لەبان یاسایل ناوخوەیی بیاشتاد، و وەگورەی دەستوور هەرێم کوردستان ئازادە لە شیوەی جیوەجیکردن ئەو پەیماننامە.
زیباری داوا لە دادوەری کرد جویر دەسەڵاتیگ سەروەخوەی کار لە هەماهەنگی و هاوکاری وەرد دامەزراوەیل پەیوەندیدار لە چین دژە شکەنجە بکەێد، وتیش: هویچ کەسیگ لە هەرێم کوردستان وە فەرمان دادوەری شکەنجە نەدریاگە، و چەن رەفتاریگ تاکانە هەس لەیرا و لەورا، وئەوەیش وە هویچ شیوەیگ یاسا پشتگیریی نەکردیە.
