لە راپۆرتیگ ئاژانس مهر ئیرانی کە ئاژانس شەفەق نیوز ئەڵگەردان ئەرای کردیە هاتیە، پارێزگای ئیلام ناسریاگە وە کویەی زاگرۆس وە یەکیگ لە رەنگینترین پارێزگایەیل خوەرئاوای ئیران دانرێد؛ شمارەی فرەیگ لە شوینەوارەیل گەشتوگوزاری ها لە سرووشتە ناوازەگەی.

جی باس کردنە ئێ پارێزگایە کەفێدە ناوەین کویەیل و بەرزایەیل و دارسانەیل  رەنگینیگ، لەوەر یە کرێد لەوەر سرووشتەگەی وە یەکیگ لە گرنگترین شوینەیل دابنرێد ئەرا سەردان کردن یەکیگە لە هووکارە گرنگەیل ئەرا گەشتەیل گەشتوگوزاری.

ناوچەیل سەرنجراکیش کەشتوگوزاری

بی گومان دوول ویژدرون وەیکیگ لە شوینە گەشتیاریەیل  پارێزگای ئیلام دانرێد ساڵانە شمارەی فرەیگ گەشتیار وە لای خوەی کیشێد، دوول ویژدران خاوەن سرووشتیگ ناوازەس، کەفێدە دویری 20کم لە شار ئیلام وە کنار بەنداو (چەم گەردلان) رەنگین نزیک ئاوای میهر لەشار مەلکشاهی و کرێد لەری ریگەی  (مرباره) یا ری  (كان گنبد) وەپی بڕەسید.

تەنگەگە یادگاریەیل جوان و چێژبەخشیگ بەخشێد وە ئایەم، لە بەرزی 810 مەتر لەبان دەریا و کە فرە گەپە، درویژیەگەی رەسێدە 6کم  بەرزەی سەنگەیلی رەسێدە 200 مەتر.

هەمچەشنی گەشتیاری

دووڵ تەنگ ویژدرون خاوەن سروشت ناوازەیگە، چونکە گژوگیا و ئاژەڵەیل جوراوجوریگ گرێدەخوەی  کە وە شوینیگ گرینگ دانرێد ئەرا زندگی کردن، وە پای دانشتگەیل ناوچەگە، لە گوزەشتە ئاژەڵەیل جویراوجورایگ بوونیان بویە جویر خرس و گورگ و گوراز لەی شوینە زندگی کردنە.

هووکار ناو ناینەگەی

ویژدرون ناویگ کوردیە وەبان ئێ دووڵە دانریاگە، لە زوان کوردی وشەی "ویژ" وە مانای قویڵ و "درون" وە مانای دووڵ تێد، واتە ویژدرون وە مانای دووڵ قویڵ تێد کە خاوەن بەرزی گەپیگە، وەپای ئەوەگ ئوشرێد، هووکار ناوناین دووڵەگە بریتیەلە وای توونیگ لەی ناوچە، چوینکە "ویژ" وە مانی وایش تێد، لەی حالەە ویژدرون مانی دووڵ وا تێد.