وە بەشداری خوەنەوار و داڵگ و باوگەیلیان...مامووسایەیل سلێمانی خوەنیشاندانەیلیان فراوان کەن
نوێنەر مامووسایەیل نارازی دڵشاد میزانی، لە کۆنگرەیگ رووژنامەوانی کە ئاژانس شەفەق نیوز ئامادە بوی راگەیان؛ "سوو یەکشەممە و رووژ سێشەممەی ئایندە لەنوای بینای وەڕیوەبەرایەتی پەروەردەی سلێمانی خوەنیشاندانەیلیان نووەوکەن، وە مەبەست پشتگیری کردن لە مانگردنەگە کە ماوەی زیاتر لە مانگیگە وەردەوامە لە دامودەزگایەیل فێرکاری و بڕیگ لە فەرمانگەیل حکومی.
وتیش "مانگردن مامووسایەیل تەنیا ئەرا داواکاری مافەیلیان نییە بەلکم ئەرا پاڵپشتیکردن داواکاریەیل فەرمانبەرەیل و مامووسایەیل زانکۆشە، دویای بەشەوکردن مووچەی مانگ ئاب خوەنیشاندان تریش ئەنجام دەێمن".
محەمەد کەمال نوێنەر مامووسایەیل خۆبەخش لە کۆنگرەگە راگەیان "مانگردن خۆبەخشەیل چوودە ناو هەفتەی شەشەمەو وەبی ئەوەگ هویچ چارەسەریگ فەرمی ئارەستەمان کریاوێد، یەیش جویر سزایگە ئەرامان، وەی مدوو وەردەوام بویمن لە مانگردن تا جیوەجیکردن گشت داواکاریەیلمان".
محەمەد ئەحمەد نوێنەر مامووسا ناڕازیەیل زانکۆی سلێمانی، لە کۆنگرەگە راگەیان، سوو دەرچن ئەرا خوەنیشاندانیگ لە نوای بینای سەرۆکایەتی زانکۆ و وەرەو وەڕیوەبەرایەتی پەروەردەی سلێمانی چن و پاڵپشتی خوەنیشاندانەیل گشت چینەیل کەیمن، داوا لە خوەنەوار و مامووسایلیش کەیمن بەشداری خوەنیشاندانەیل بکەن.
