وەئامادەبوین نێچیروان بارزانی.. پیشوازیکردن و ماڵئاوایی لە تەرم قوربانیەیل تووپواران زاخۆ لە هەولێر
شەفەق نیوز/ رسوومەیلیگ فەرمی، ئمڕوو پەنجشەممە، وەئامادەبوین نێچیروان بارزانی سەرۆک هەرێم کوردستان وەڕیەو چگ، ئەرا پیشوازیکردن و ماڵئاوایی لە تەرم قوربانیەیل ئەو تووپوارانە ک سەیرانگایگ لە ئیدارەی ناوچەی سەروەخوەی زاخۆ کردە ئامانج.
رسووەمیل لە فڕۆکەخانەی ناودەوڵەتی هەولێر وەڕیەو چگ، ک پیشوازی لە تەرم قوربانیەیل کریا ک لە دهۆک هاوریان، ولە خود وەختەگە ئەوەسا ماڵئاوایی لەلیان کریەێد تا بوریەن وەرەو فڕۆکەخانەی ناودەوڵەتی بەغداد و بیریەنە دەس کەسوکاریان.
سەرۆک نێچیروان بارزانی، وهەمیش نوینەر بەڕێز مەسعود بارزانی، و سەرۆک حکومەت هەرێم کوردستان مەسرور بارزانی، و سەرۆکایەتی پەرلەمان کوردستان، و وەزیر دەرەوەی عراق فوئاد حسێن، چەپکە گوڵ نانە بان ئەو سەکووە ک تەرم نۆ قوربانی هابانی.
قسەکەریگ لەناو رسوومەیل پیشوازیکردن لە تەرمەیل وت: وەداخ سەختیگ ئەرا کارەساتیگ لەبان خاک نیشتمان بوی، هەنای خەڵکەگە وەختەیل خوەشیگ لەباوەش کوردستان لە زاخۆ وەسەر بردیان، کەفتنە وەر ئاگر گورز تورکیا، ک بویە هووکار شەهیدبوین ٩ مەدەنی و زەخمداری ٢٦ کەس.
وتیش: وەداخەو ک رەوشەیل لە ناوچەیل سنووری یە ماوەی درویژیگە ئارام نییە، ک هیشت خەڵکمان لە مەدەنیەیل لەوەر ئەو جەنگەیلە ناوبەین هیزەیل تورکیا وپەکەکە لەبان زەوی عراق وهەرێم کوردستان بار بکەن، ک مەدەنیەیلیگ لەو ناوچەیلە بوینە قوربانی لەی جەنگە.
قسەکەرەگە وتیش: ئیمە لە هەرێم کوردستان مقەیەتی ئاسایش و ئارامی و سەڵامەتی هاووڵاتییەیل کەیمن، و وەسەختی شەرمەزار هەر پەلاماریگ لەبان هاووڵاتییەیل مەدەنیمان کەیمن وەهەر دەسپیچگیگ بویە، وداوای وسانن ئەو گورزەیل وەردەوامە لەبان ناوچەیل سنووری کرد.
هەمیش داوا لە هیزەیل تورکیا وپەکەکە کرد ئەو جەنگە لەناوبەینیان لە زەوی هەرێم کوردستان دویرەو بخەن، ورێز لە سەروەری عراق و هەرێم کوردستان بگرن.
