هەولێر ئاسانکاری فرەتریگ لە کردنەوەی عەیادەیل پزشکی وشوینەیل بازرگانی وپیشەسازی بەسریاگ راگیەینێد.
شەفەق نیوز/ حوکمەت ناوخۆی پارێزگای هەولێر لە دوارە کردنەوەی عەیادەیل ( نوڕینگە) پزشکی ونوڕینگەیل دگانیش وەل ئەگەرەو راگەیان، وەگەرد مەنین قەیەغەی هاتوچوەگە وەگورەی بڕیار وزارەت ناوخۆی هەرێم کوردستان.
فرسەت سوفی سەرۆک حوکمەت ناوخۆ لە کونگرەیگ ک بەسیا وەل دکتور دلوڤان محمد جلال وەڕیەوبەر تەندروسی گشتی لە پارێزگاگە وت: بڕیار دریا وە ئاسانکاری لە دوارە کردنەوەی نوڕینگەیل پزشکی ونوڕینگەیل دگان لە پارێزگاگە لە سو چوارشەمەو وەل بڕیگ مەرج.
وتیش ک کارو بەرژوەندی مەردم گرنگترین چشتن لای پارێزگاگە، ودویای روژ 2020/4/24 ئاسانکاریەیل فرەتریگ کرێد وە دوارە کردنەوەی بازاڕەیل، وهاتنوەی ماشینەیل کرا ئەرا کاریان، وکردنەوەی شوینە گشتیەگان، وە مەرج چەودێری لە رینماگان وکارەیل مقەیەت بوین، وەل وەردەوام بەسانن شوینەیل فرە گردەوبوین.
وتیش ئمڕو نوەم 9 روژە ک هیوچ تویشهاتگیگ وە ڤایروس کۆڕۆنا تۆمار نەکریدیمنه، وەلی یە نیه ک ترس ئی پەتا نەمەنیە.
و لای خوەیشەو دکتور دلۆڤان محمد لەو کۆنگرە وت: دویای گفتوگو وەل سەندیکای پزیشکەیل لە هەرێم کوردستان بڕیار دریا لە دوارە کردنەوەی نوڕینگەیل تایبەت و نوڕینگەیل دگان، تەنانەت ئیمە وەرەو مانگ رەمەزان چیمن، وفرە کەس لە ماوەی پیش نیاز وە سەردان پزشک داشتوین ونەتوانستن بچن وەبونەی قەیەغەی هاتوچو.
وتیش ک بڕیار دریا لە سوەو دوارە نوڕینگەیل تایبەت ودگان بکریەنەو وەلی وەگەرد پابەندبوین وە کارەیل تەندروسی جویر کردنەوەی عیەیادەیل لە ساعەت دو دویای نیمەڕو تا پەنج ئیواره، ونەبایەت بزشک فرەتر لە 10 نەخوەش لە یەک روژ بوینێد وبایەسه لە چوار کەس فرە تر گردەو نەون لەناو یەک نوڕینگە، وبەینیان دو مەتر بود وەل مەقەیەتی ئەرا نەخوەشەیل وپزیشکەیل.
