هونەرمەنەیل کوردستان دەسکەێدە گردەوکردن دەسمیەتی ئەرا زەرەدمەنەیل زەویلەرزەی تورکیا و سوریا
2023-02-08T16:26:26+00:00
شەفەق نیوز/ سەندیکای هونەرمەنەیل لە هەرێم کوردستان، ئمڕوو چوارشەممە، دەسکردنی وە گردەوکردن دەسمیەتی مرۆیی ئەرا زەرەدمەنەیل زەویلەرزەی تورکیا و سوریا راگەیان، و دیاری کرد ک کەمپینەگە تا چوار رووژ وەردەوامە.
هیوا سوعاد سەرۆک سەندیکای هونەرمەنەیل لق هەولێر لە کۆنگرەیگ رووژنامەوانی ئاژانس شەفەق نیوز ئامادەی بوی وت: ئمڕوو دەسکەیمنە کەمپینیگ ئەرا گردەوکردن دەسمیەتی مرۆیی ئەرا زەرەدمەنەیل زەویلەرزەی تورکیا و سوریا.
وتیش: ئی هەڵمەتە تا چوار رووژ وەردەوامە لە دەی شەوەکی تا شەش ئیوارە، و دیاری کرد ک هەڵمەتەگە ئەو دەسمیەتیەیلە گرێدەو ک هونەرمەنەیل هەرێم کوردستان پیشکەشی کەن، و هەر کەسیگ بخوازێد بەشداری بکەێد.
هەڵمەت و کەمپینەیل دەسمیەتی لە هەرێم کوردستان هەمەڕنگ بوین، هەر لە حکومەت هەرێم کوردستان دەسوەپی کرد تا رەسێدە چینەیل کۆمەڵگا ئەرا هاناڕەسین زەرەدمەنەیل تورکیا و سوریا لەو زەویلەرزەی مەرگبارە ک خەڵکەگە کەفتنە ورەی، و هەزاران لەلی بوینە قوربانی و شمارەیگ گەورەتر سەرگەردان بوین، چوینکە ماڵ و شاریان داغان بوین.
