هاوپه‌یمانی كوردستانی كێشه‌ێگ نيه‌وينێ له كلكردن پرسیار نويسریاێ ئه‌ڕا بارزانی
(شه‌فه‌ق نیوز) له زووان ئه‌ندام ليژنه‌گه عه‌باس ئه‌لخوزاعی خه‌وه‌ر داگه ، سه‌روكايه‌تی ليژنه‌گه، ئه‌ندامه‌یل ليژنه‌ێ ته‌حقیقی تایبه‌ت وه ڕمیان موسڵ ئاگادار كردگه‌سه‌و ك بايه‌د له ماوه‌ێ سێ ڕووژ پرسیاره‌یل نويسیاێ تایبه‌ت وه نوری مالكی و ئوسامه نوجێفی و مه‌سعود بارزانی ئاماده بكه‌ن، تا ليژنه‌گه جیایانه‌و بكا و كلێ بكا ئه‌ڕا لايه‌ن په‌یوه‌ندیدار و زیاتر وتگه: ليژنه‌گه چه‌وه‌ڕێ جوواو پرسیاره‌گان له‌و سێ سه‌ركرده ئه‌كا له باوه‌ت ڕویداگه‌یل موسڵ.
ئه‌ندام هاوپه‌یمانی كوردستانی ئه‌مین به‌كر له لێدوان تایبه‌تێگ ئه‌ڕا (شه‌فه‌ق نیوز) وتگه: هويچ كێشه‌ێگ نییه له كلكردن پرسیاره‌یل نويسریاێ ئه‌ڕا سه‌رۆك هه‌رێم كوردستان له باوه‌ت ڕمیان موسڵ، و باس ئه‌وه‌یش كردگه مه‌سه‌له‌گه زیاتر په‌یوه‌ندی وه میوانداریكردن مالكیه‌و داشتگه، له‌وه‌ر ئه‌وه‌گ فه‌رمانده‌ێ گشتی هێزه‌يل چه‌كدار بويه.
زیاتريش وت: ناكووكیه‌یل بڕێگ لايه‌نه‌یل، ليژنه‌گه ناچار كردگه پرسیاره‌یل نويسریاێ ئه‌ڕا ئه‌و سێ سه‌ركرده كلبكا، چوين هاله‌و باوه‌ڕه ك ئه‌وان په‌یوه‌ندی وه كێشه‌ێ موسڵه‌و دێرن.
وه‌يه‌یش ئاماژه كردگه ك هاوپه‌یمانی كوردستانی هويچ كێشه‌ێگ نیه‌وينێ له‌و پرسیاره‌یله ئه‌گه‌ر خزمه‌ت وه كار ليژنه‌گه بكا ئه‌ڕا ڕه‌سین وه ڕاسیه‌گان.
ئه‌نجومه‌ن نوێنه‌‌ره‌یل عراقی له مانگ تشرین دويه‌م گوزه‌یشته، ليژنه‌ێگ په‌رله‌مانی ئه‌ڕا ته‌حقیق كردن له باوه‌ت هوكاره‌یل كه‌فتن موسڵ وه‌ده‌س چه‌كداره‌یل داعش له حوزه‌یران گوزه‌یشته دروسكرد.
ليژنه‌گه كاره‌گانێ وه میوانداریكردن فه‌رمانده سه‌ربازی و ئه‌منیه‌گان ده‌سوه‌پێكرد له‌وانه‌یش فه‌رمانده‌ێ هێزه‌یل زه‌مینی و فه‌رمانده‌ێ وه‌رین ئۆپه‌راسيۆنه‌یل نه‌ینه‌واو فه‌رمانده‌ێ چه‌ن لیواێگ سه‌ربازی و ژماره‌ێگ له ئه‌ندامه‌یل ئه‌نجومه‌ن پارێزگاێ نه‌ینه‌وا.
