هەولێر و سلێمانی.. دەسگیرکردن بکوشیگ و باندیگ دزیکردن.. وینە و ڤیدۆ
شەفەق نیوز/ دەزگای ئاسایش هەرێم کوردستان، ئمڕوو یەکشەممە، دەسگیرکردن تەومەتبار سەرەکی لە تاوان کوشتن ژنیگ لە شار هەولێر راگەیان، و پولیس سلێمانی توەنست دوو توومەتبار وە دزیکردن ماشین بگرێد.
دەزگای ئاسایش لە بەیاننامەیگ رەسیە ئاژانس شەفەق نیوز وت: تاوانەگە لە 11ی كانون دویەم 2025 بویە، کە ژنیگ وەناو (ز، ی، ت) وەدەس براگەی وەناو (ت، ی، ت) لەئەنجام دەمەقاڵیگ خیزانی کوشیا، و ئەو پرسە گرنگی فراوانیگ داشت دویای بڵاوکردنی لە میدیایل، کە هیشت دەزگای ئاسایش هەرێم کوردستان زویوەزوی بکەفێدە جویلە. وتیش: دەسکریا لێکۆڵینەوەی گشتگیر وە بەشداریکردن وەڕیەوبەرایەتی ئاسایش خوەرهەڵات هەولێر و ئاسایش سلێمانی، و هاوکاری وەرد وەڕیەوبەرایەتی تەکنەلۆژیای زانیاری، ئەرا وەشوینکەفتن جویلەی توومەتبارەگە، و رەسیە دیاریکردن شوینی لە شار کۆیە. وتیش: لە 15ی كانون دویەم 2025، هیزەیل ئاسایش توەنستن توومەتبارەگە دەسگیر بکەن و دەس وەبان ئەو چەکە بنەن کە ئەرا جیوەجیکردن تاوانەگە وەکار هاوریاس، دووپاتیش کرد کە توومەتبارەگە ئیسە کەفتیەسە ریکارەیل یاسایی وەگورەی مادەی 406 لە یاسای سزادان عراقی.دەزگاگە ئافەرین لە تەقەلایل فیرقەیل ئەمنی و هاوکاری کارایان کرد کە رەسیە ئەو وەزوی توومەتبار دەسگیر بکەن، و دووپات لە پابەندبوینی وە وەردەوامی کار ئەرا مقیەتیکردن ئاسایش و ئارامی و وەشوینکەفتن تاوانکارەیل کرد. دیاری کرد کە تاوان کوشتنەگە لە دویای کێشەیل خیزانی رویداوەگە، کە نشان زیایبوین گرنگی هوشیاری کۆمەڵایەتی دەێد لەباوەت چارەکردن مرافەیل خیزانی وەشیوەی ئاشتیانە. وەڕیەوبەرایەتی پولیس سلێمانی، دەسگیرکردن دوو توومەتبار وە دزیکردن ماشینیگ راگەیان، ئەوەیش دویای لێکۆڵینەوەی زویوەزوی دویای وەرگردن ئاگاداری لە هاوڵاتییگ. لە بەیاننامەیگ رەسیە ئاژانس شەفەق نیوز وت: هاوڵاتییگ ئاگاداری لەبان دزیان ناسینی توومار کرد، و تیمەیل دژە تاوان وە هاوکاری وەرد وەڕیەوبەرایەتی دژە تاوان لە قەزای رانیە و ئاسایش سلێمانی دەسکردنە لێکۆڵینەوەی فراوانیگ ئەرا وەشوینکەفتن تاوانکارەیل. وتیش: تیمەیل ئەمنی دویای گردەوکردن زانیاری و دەرچگن بڕیار دادوەری، توەنستن شوین ئەو دوو توومەتبارە دیاری بکەن، و ماشینە دزیایەگە لەلایان پەیا بکەن، کە هەر لە (ب، ح، م) لەداڵگبوی ساڵ 2002 و(س، ئ، و) لەداڵگبوی ساڵ 2000، کە هەردوگیان وەگورەی مادەی 446 لە یاسای سزادان عراقی بەندی کریان.
