هەولێر توومارکردن ١٥٠ تویشهاتن تەو خوینوەربوین رەت کەێد
2023-06-01T13:28:48+00:00
شەفەق نیوز/ وەڕیەوبەرایەتی تەندروسی گشتی هەولێر پایتەخت هەرێم کوردستان، ئمڕوو پەنجشەممە، ئەو خەوەرەیلە ک باس توومارکردن ١٥٠ تویشهاتن وە تەو خوینوەربوین لە پارێزگاگە رەت کرد.
وەڕیەوبەرایەتیەگە لە بەیانامەیگ رەسیە ئاژانس شەفەق نیوز وت: ئەو خەوەرەیلە ک باس توومارکردن ١٥٠ تویشهاتن وە تەو خوینوەربوین لە راسیەو دویرن، وتیش؛ ئی توویشهاتنەیلە هن پارێزگایل ناوڕاس و باشوور عراقە، و پارێزگای ھەولێر هویچ پەیوەندییگ وەپیان نەیرێد.
دووپات کرد ک پارێزگای هەولێر تا ئیسە دوو تویشهاتن وە تەو خوینوەربوین توومار کردگە.
دویەکە چوارشەممە، وەڕیەوبەرایەتی تەندروسی هەولێر کردن گەنجیگ لە تەمەن ١٩ ساڵان وە تەو خوینوەربوین راگەیان.
