هەولێر باس سەختەوکردن ریکارەیل کەێد
شەفەق نیوز/ ئومێد خۆشناو پارێزگار هەولێر، ئمڕوو جمعە، پەنابردن دەسەی باڵای نواگردن ڤایڕۆس کۆڕۆنا لە هەرێم کوردستان ئەرا پەسەن دووارە قەیەغەکردن هاتووچگن لەی وەختە وەدویر زانست، باوجی لە خود وەختەگە سەختەوکردن ریکارە مقەیەتیەکان لە کۆبونەوەی دەسەگە وە دویر نەزانست.
ئەوەیش لە کۆنگرەیگ رۆژنامەوانی هاوبەش وەگەرد سامان بەرزنجی وەزیر تەندروسی لە مەوقەی رەسین بەشەگەی هەرێم لە واکسین دژوە کۆڕۆنا لە حکومەت فیدڕالی هات.
خۆشناو هووشداری لە بەرزەوبوین رێژەی تووشهاتنەکان وە پەتاگە کرد و زیایبوین جەختەگە لەبان خەسەخانە حکومەتیەکان، و داوا لە خەسەخانە تایبەتەکان کرد دەسمیەتی کەرت تەندروسی گشتی بیەن لە دابینکردن شەوخەف ئەرا وەرگردن تووشهاتگەیل ڤایڕۆس کۆڕۆنا.
خۆشناو لە کۆنگرەگە وت: خاسترین واکسین و خاسترین چەک ئەرا نواگردن ڤایڕۆسەگە و خاسترین شیوە ئەرا کەمەوکردن مردنەیل و تووشهاتنەیل خوەی خود دانیشتوەیلە، داوا لەلیان کەیمن پابەند و بڕیارەیل دەسەی باڵا بوون، و دەمامەک وەکار بارن، و تێکڵا نەوون.
و ئاماژە کرد ک دەسەی باڵای نواگردن ڤایڕۆس کۆڕۆنا لەماوەی رووژەیل ئایندە کۆبونەوە کەێد، و هەڵسەنگاندن ووردیگ ئەرا رەوشەگە کەێد.
پارێزگاگە ئاماژە کرد ک هیچ ئەگەریگ ئەرا هاوردنەوەی قەیەغەی هاتووچگن نییە، وەلی لەوەر بەرزەوبوین رێژەی تووشهاتنەکان وە کۆڕۆنا وەگورەی هەڵوێست رووژانەی پەتاگە، ئەوەسا بەرنامەگەی نواگردن ڤایڕۆسەگە ئاڵشت کریەێد.
