هەولێر بەشداری هەڵمەت نواگردن تونوتیژی دژوە ژن کەێد.. وینە
![هەولێر بەشداری هەڵمەت نواگردن تونوتیژی دژوە ژن کەێد.. وینە](https://media.shafaq.com/media/arcella/1669628422154.jpeg)
شەفەق نیوز/ شار هەولێر پایتەخت هەرێم کوردستان، ئمڕوو دووشەممە، کۆڕیگ گفتوگۆ لەباوەت نواگردن تونوتیژی دژوە ژن گردە خوەی، لەناو هەڵمەتیگ جەهانی لەی باوەتە.
پەیامنێر ئاژانس شەفەق نيوز وت: ئی چالاکیە بەشیگ لە هەڵمەت جەهانی ١٦ رووژی تیەێد ئەرا نواگردن تونوتیژی دژوە ژن، ک وە چەودیاری حکومەت هەرێم کوردستان، و ئەمینداری گشتی ئەنجومەن وەزیرەیل عراق، و سەندوق نەتەوە یەکگرتگەیل ئەرا نێشتەجیبوین، و کۆمسیۆن باڵای کاروبار پەنابەرەیل، و دەسەی نەتەوەیل ئەرا کاروبار ژن، و بەرنامەی خوەراک جەهانی، و دامەزراو ئەوزەڵکردن کۆمەڵایەتی و خوەنەواره و ئابووریە.
زیبا تەها ئەندام سکرتاریەت یەکێتی ژنەیل کوردستان ئەرا ئاژانس شەفەق نیوز وت: ئی هەڵمەتە وەناونشان ١٦ رووژ ئەرا نواگردن تونوتیژی دژوە ژنە، ک لەناوی رەنجەیل ئەرا باسکردن ئەو گرفتەیلە کریەن ک ژن لەناو کۆمەڵگا کەفێدە وەریان، تایبەت وەگەرد وازبوین کۆمەڵگا وەرد سەردەمەگە، و ئەوەسا وەماوەی ئی ١٦ رووژە میکانیزم دیاری ئەرا نواگردن تونوتیژی دژوە ژن لە هەرێم کوردستان و گشت عراق کەیەێد، و یەسە ک یەکێتی ژنەیل کوردستان ئەرای تەقەلا دەێد.
وتیش: هەڵمەتەگە جویراوجور چینەیل ژن لەناو کۆمەڵگا کەێدە ئامانج، و خانمە ئێزدیەیل لە چینەیل سەرکی بەشدار دانەێد.
لەلای خوەییش ئیسرا مەحمود ئەو دویەت ئێزدیە ک لە کۆڕەگە بەشدارە، ئەرا ئاژانس شەفەق نیوز وت: ئی هەڵمەتەیلە دەرفەت دیرن تا وەشیوەی گەورەیگ لە چارەکردن گرفتەیل ژن وە گشتی دەسمیەتی بیەن، و ئەو گرفتەیلە لەڕوی ژن ئێزدی، وەتایبەت دویای ئاوارەبوین و پەنابەری شمارەی فرەیگ لە ژنەیل ئێزدی لەئەنجام جەنگ لە ماوەی ساڵەیل گوزەشتە.
کۆڕوگە پێشانگای دەسڕەنگینی و هونەر ئەرا خانمە رزگاربویەیل لە تونوتیژی و ئاوارەیل لەناوی بوی، لە بەشداربوین گەورەیگ لەلایەن ریخریاگەیل نا حکومەتی، هەمیش سێ سیمینار ئەرا گفتوگۆ هاناوی ک پسپۆرەیلیگ حکومەتی و دیبلۆماسی و وەرپرسەیلیگ لە نەتەوە یەکگرتگەیل و چالاکوانەیل و ریخریاگەیل نا حکومەتی باس بڕیگ باوەت کەن دەربارەی نواگردن تونوتیژی دژوە ژن ویەکسانی ڕەگەزی، و بەشدارکردن پیاوەیل لە نواگردن تونوتیژی دژوە ژن و دویەتەیل، و کار ئەرا نەهیشتن شویکردن وەرجەوەخت.