هەڵمەتیگ لە کوردستان ئەرا هووشیارکردن لە "ئایدز".. 61 تویشهاتن زیاتر بیانین
شەفەق نیوز/ حکومەت هەرێم کوردستان، هەڵمەتیگ هووشیاریکردن جیوەجیکەێد ئەرا سنووردارکردن بیماری ڤایرۆسی ئایدز.
وەڕێوەبەرایەتی خوەیپاراستن تەندروسی هەولێر د.بێریڤان عەدنان وە ئاژانس شەفەق نیوز وت، لە هەرێم حالەتەیلیگ تویشهاتن وە ڤایرۆسەگە هەس، باوجی تویشهاتگەیل زیاتر بیانین لەدویای توومارکردنیان ئەرا وڵاتەگەیان کلەوکریانە.
دووپاتکرد، لە هەرێم 61 حالەت توومارکریاس ، 34 حالەتی لە هەولێر و 21 حالەتی لە سلێمانی و 6 حالەتی لە دهۆک.
وتیش؛ رێکارەیل پزیشکی پێویست لە وەرانوەر تویشهاتگەیل گیریاس و چەودێری پزیشکی لەبانیان وەردەوامە.
دیاریکرد، ڤایرۆسەگە هاتێ لە چەن ریگ بگوازێد، لەدیارترینیان مامەلەی سێکسی بی پارێزیگ، و وەکارهاوردن کەرەستەیل پزیشکی پیس بوی وەرد گواستنەوەی خوین.
حکومەت هەرێم کوردستان ساڵانە وشکنین خۆرایی ئەرا ڤایرۆس HIV کەێد وەرد هەڵمەتەیل هووشیاریکردن لەرێ دامودەزگایەیل تەندروسی.
