هەرێم کوردستان ٦٥٪ لە کارەیل گەورەترین پڕوژەی ماسی لە ئاست عراق تەواو کەێد
وەگورەی بڵاوکرایاگ سایت فەرمی حکومەت هەرێم کوردستان، ئی پڕوژە پڕەوکردن خوازین ناوخوەیی کەێدە ئامانج، و گەشەداینی ئەرا ئاست هەناردەکردنی وەرەو دەیشت، ک لە یەکەم قوناغی توەنێد ٢١ مەلیۆن خولگەماسی بەرهەم بکەێد، وەگەرد ١٢٠٠ تەن لە گووشت ماسی ساڵانە.
سایتەگە لە زوان شوکری عومەر وەڕیەوبەر پڕوژەگە وت: ئی پڕوژە یەکیگە لە پڕوژەیل ستراتیژی و تەواوکەر کشتوکاڵی لە هەرێم کوردستان، سەرمایەگەی رەسێدە ١٠ مەلیۆن دۆلار، و ئیسە ٥٠٠ دەرفەت کار وەشیوەی راستەخۆ و نا راستەخۆ ئەرا هاووڵاتیەیل پەیا کردیە.
دیاری کرد ک تا ئیسە هویچ پڕوژەیگ ماسی لەیجویر و میکانزمە لە هەرێم کوردستان و گشت عراق نەکریاگە، و هەمیش تەکنەلۆجیای پیشکەفتگ لەناوی وەکار هاوریاگە.
پڕوژەگە لەبان ٢٢٩ دۆنەم کریاگە، ک لەخا ئەڵاوردن و تاقیکردنەوە و گوڵەم و قەفەس ماسی هاناوی، و پلان ئەرا کارخانەی لەوەڕ لەناوی هەس، و بڕیارە دویای پڕەوکردن خوازین ناوخوەیی، بەرهەمەیل کارخانەگە ئەرا ئەو ناوچەیل عراق کل بکەێد، و هەمیش هەناردەکردنی وەرەو دەوڵەتەیل خەلیج.
