هەرێم کوردستان قیبلەی گەشتیارەیلە لە جەژن.. وینە
شەفەق نیوز/ رەسین گەشتیارەیل لە پارێزگایل ناوڕاس و باشوور عراق ئەرا هەرێم کوردستان دەسوەپی کرد، ئەرا خوەشگوزرەانی وە پشوو جەژن قوربان، لەی هەفتە، ک فرە لە هوتێلەیل هەرێم، لەلایەن گەشتیارەیل وگرووپەیل گەشتیاری گیر هاوریان.
عەتا ئەنوەر وەرپرس کۆمپانیایل گەشتوگوزاری لە سلێمانی لە بەیاننامیگ رەسیە ئاژانس شەفەق نیوز وت: گریەبەسیەیل فرەیگ لەناوبەین کۆمپانیایل گەشتوگوزاری لە سلێمانی وەگەرد کۆمپانیایل گەشتوگوزاری عراقی و ئیرانی واژوو کریا، ئەرا هاوردن گەشتیارەیل فرەیگ وە بوونەی جەژن قوربان ئەرا پارێزگاگە، و دووپات کرد ک لەی هەفتەو گەشتیارەیل رەسینە سلێمانی.
ئەنوەر وتیش: نرخەیل لە هوتێلەیل سسلێمانیو هەولێر وە شیوەی وەرچەویگ گرانەو بوین، ئەرا نموونە نرخ یەک شەو ئەوسا لە ١٣ تا ١٥ هەزار بوی، و ئیرنگە بویەسە ٤٠ هەزار دینار، و کرای ژووریگ چوار کەسی ئەرا یەک شەو لە ١٣٠ هەزار دینار رەد کرد.
ودیاری کرد ک ئی گرانیە وەبوونی جەژن قوربان ورەسین گەشتیارەیل بوی، وەگەرد ئەوەیش هوتێلەیل لە رووژەیل پشوو پڕە لە گەشتیارەیل، وتیش: بڕیگیش لە گەشتیارەیل لە ئیرانەو تیەن، ومەزەنە هەس گەشتیارەیل فرەیگ لە پشووە بان، چوینکە گەشوهەواگە هوونکە وشوینەیل گەشتوگوزاری هەس، و ئاسانکاری ئەرا وەناوهاتن گەشتیارەیل لەڕی فڕۆکەخانەیل وخاڵەیل سنووری هەس.
لەلای خوەییش، مەحمود تەوفیق سەرۆک کۆمەڵەی هوتێل و چیشتەخانەیل سلێمانی لە بەیاننامیگ رەسیە ئاژانس شەفەق نیوز وت: گشت هوتێل و چیشتەخانەیل لە رووژەیل پشوو جەژن قوربان ئەوەسا واز بوون، و رینمایلە لەلاین چیشتەخانەیل و هوتێلەیل جیوەجی کریان.
وتیش: نرخەیلە وەگەرد کۆمپانیایل گەشتوگوزاری ک لەلایەن چیشتەخانە و هوتێلەیل سلێمانی وەگەردیان گریەبەسی کریاگە فرە گرانەو نەویە، وهاتئ لە ٥% زیاتر بەرزەو نەویە، ویەیش چشتیگ ئاساییە.
لەلای خوەییش، کارزان محمد پسپۆڕ ئابووری ئەرا ئاژانس شەفەق نیوز وت: هەنای گەشتیارەیل سەردان هەر دەوڵەتیگ کەم، دانیشتگەیل ئەو دەوڵەتە وناوچەگە وەگشتی سوود لەلیان گرن، ک شایەت گەشتیارەیل ماشین ئەرا هاتوچگن یا شوینیگ ئەرا خەفتن یا چیشتخانەیل ئەرا خواردن بخوازن.
محمد وتیش: گەشتیارەیل وەشیوەی گشتی جویلەی فرە خاسیگ خەنە بازاڕ، ک هیلێد خاوەن دوکان وهوتێل و چیشتەخانەیل کاریان فراوانەو بکەن، ولەلیان سوود بگرن.
و دیاری کرد ک گەشتیارەیل بوونە سەرچەوەی داهاتیگ ئەرا خاوەن کارەیل، ک هەرێم کوردستان جویلەی گەشتوگوزارییگ دیرێد ک یە چەن ساڵیگە وەردەامە، وسەدان هەزار لە گەشتیارەیل سەردان پارێزگایل هەرێم کوردستان کەن، پویل فرەیگ لە گەشتیارەیل چوودە گیرفان خەڵک هەرێم کوردستان.
هەرلیوا، ئەمەل جەلال خانمە سەرۆک دەزگای گەشتوگوزاری لە حکومەت هەرێم کوردستان، لە بەیاننامیگ رەسیە ئاژانس شەفەق نیوز باس ئامادەکاری تەواوی لە گشت ناوچەیل هەرێم کوردستان کرد، ئەرا وەسەربردن جەژن قوربان وەگەرد رەسین گەشتیارەیل.
وەگورەی ئامارەیل گەشتوگوزاری لە هەرێم کوردستان، زیاتر لە یەک مەلیۆن گەشتیار ساڵانە سەردان هەرێم کوردستان کەن.
