هەرێم کوردستان کەفێدە جویلە ئەرا ئاشکراکردن چارەنویس مناڵەیلیگ لە ئیران بیسەروشوین بوینە
شەفەق نیوز/ عەبدولڵا حاجی مەحمود وەزیر کاروبار شەهیدەیل و ئەنفالکریاگەیل لە هەرێم کوردستان، ئمڕوو چوارشەممە، دروسکردن ئەنجومەنیگ راگەیان ئەرا ئاشکراکردن چارەنویس ئەو مناڵەیلە راگەیان کە لەناو گورز کیمیایی وەبان شار هەڵەبجە وەدەس رژیم وەرین لە کۆتایی هەشتایل سەدەی گوزەشتە باوگ و داڵگیان دەسدانە، و تا ئیسە لە ئیران مەننە.
حاجی مەحمود لە کۆنگرەیگ رووژنامەوانی وت: دویای کەفتن بڕیگ خیزان وە قوربانی لە شار هەڵەبجە و دەورگردی لەوەر ئەو گورزە، بەشیگ لە مناڵە بوبچگەیل ئەرا خەسەخانەیل کۆمار ئیسلامی ئیران بریان، و ئەو مناڵەیلە هەر لەورا مەنن.
وتیش: هیمان چارەنویس بڕیگ لەو مناڵەیلە دیار نییە، ئەراوە ئی ئەنجومەنە وە رەزامەنی ئەنجومەن وەزیرەیل و دویای باسکردنەیل دویر و درویژیگ دروس کردیمن.
وەزیر وتیش: ئەنجومەنەگە لە وەزارەت و فەرمانگەیل حکومەتی پەیوەندیدار وەی باوەت گرنگە لە هەرێم کوردستان دروس کریا، و دووپات کرد کە ئەرک ئەنجومەنەگە بی سەختی نییەر لەسای نەوین داتایلیگ پەیوەندی وەو مناڵەیلە بیاشتوون.
لە ١٦ی ئادار ١٩٨٨، فڕۆکەیل جەنگی عراق وەبان ئاسمان هەڵەبجەو تا ماوەی پەنج ساعەت باڵ گردن، و تیکەڵەیگ لە گاز خەردەل و سارین و گازەیل دەمار بشیون وەشانن، و بویە هوکار کوشیان پەنج هەزار کەس فرەیان ژن و مناڵ بوین، وەگەرد هەزاران زەخمدار.
