هەرێم کوردستان رەتکردنی ئەرا گلەوخواردن ناچاری ئاوارەیل نووەو کەێد: ئەوەگ مینێدەو تیکە نانەگە وەگەردی بەشەو کەیمن
ئەحمەد لە کۆنگرەیگ رووژنامەوانی کە ئمڕوو لە هەولێر وەڕیەو چگ راگەیان: هەناێ رویوەڕوی قەیرانیگ دارایی گەورە کەفیمن کە وە بڕین بەش هەرێم لە بودجەی دارایی عراق و مووچەی فەرمانبەرەیل، لەو وەختە کە جەنگمان لە دژ داعش ئەنجام دایمن، زیاتر لە دوو ملیۆن ئاوارە و پەنابەر لە ناو و دەیشت عراق وەرگردیمن، وتیش: "هویچ بڕیاریگ لەلایەن ئیمەوە دەرنەچیە تا ئی ئاوارەیلە پەنا وە هەرێم بوەن. بەڵکم ئەوە لە ئەنجام رەوش ئەمنی و نەوین دڵنیایی ئاوار بوینە، خەڵک فرەیگ لە پارێزگایل عراق ئاوارە بوین و هاتنە کوردستان".
وتیش: ئەوە بڕیار حکومەت هەرێم و خەڵک کوردستان بویە کە وەردەوام بوون لە فریاگوزاری ئەرا زیانلیکەفتگەیل، وتیش: بەشیگ فرە ئەو ئاوارەیلە ئەرا ماڵ و میلکان خوەیان گلەو خواردنە، بەڵام تا ئیسە نزیکەی ملیۆنیگ ئاوارە و پەنابەر لە هەرێم کوردستان دیریمن.
وەزیر ناوخۆی هەرێم رەخنە لە رەفتارکردن وەرد وەرپرسەیل وەزارەت کووچ و ئاوارەیی فیدراڵی و حکومەتی عراق گرد، وەشیوەیگ کە وە "ناوەرپرسیارانە وەگەرد باوەت ئاوارەیل لە هەرێم کوردستان نشان دەێد".
وتیش: هاوڵاتی عراقی هەس کە وەپیان خاسترە لە ناو کەمپەیل ئاوارەیی لە هەرێم کوردستان بمینن نەک ئەرا ماڵ و میلکان خوەیان گلەو بخوەن، وە ئەگەر ئاوارەیگ بڕیار بەێد بمینێدەو وەبان سەر و چەو، وتیش: ئەگەر نانیگ بیاشتویمن وەگەرد ئەو ئاوارەیلە بەشی کەیمن کە بڕیار مەنین لە کوردستان دەن”.
ئەحمەد وتیش: “حکومەت هەرێم گرنگی فرە دەێد وە پێشکەشکردن هاوکاری ئەرا نەهامەت دەیەیل، و وڵی شیوەیەش وەردەوام بویمن”، وتیش: “ئەگەر پلانیگ بوود تا ئاوارەیل لە هەرێم میلکانیان گلەو بخوەن، ئیمە لایەنگری سەرەکی بویمن، و دەسەیگ تایبەت ئەرا دەروس کردیمنە ئەرا ئاسانکاری لەی بوارە.
وەزیر ناوخۆی هەرێم وتیش: بەڵام فرەجار، بەغدا توزمەت بی بنەما ئاراستەی هەرێم کوردستان کەێد لەباوەت ئاوارە و کووچبەرەیل، وەتایبەتی لەلایەن وەزارەت کووچ و ئاوارەییەو، کە هەمیشە وە چەویگ سیاسیی نووڕێدە ئی فایلە، جویر ئەوە کە هەرگیز تەماشای نەکردیە ئی فایلە وە چەویگ مرۆیی نەکردیە، لە هەر وە تایبەت کە لە هەڵوژاردنە ناوخۆییەیل نزیک بوونەو کە بڕیارە لە کۆتایی ئمساڵ ئەنجام بیریەێد.
رێبەر ئەحمەد داوا لە حکومەت فیدراڵی و کۆمەڵگەی ناودەوڵەتی و ریخریاگەیل نەتەوە یەکگرتگەیل کرد وەردەوام بوون لە پاڵپشتیکردن کەمپەیل پەنابەرەیل و ئاوارەیل لە هەرێم کوردستان چوینکە ئەوانەگ هانە ناوی وە رەوش ژیانیگ فرە سەخت رەد بوون وەتایبەت وەگەرد هاتن وەرز پایز، نزیکبوین وەرز زمستان ، و کەشوهەوای سەرد، وتیش: "هویچ گەرمکەریگ لەو کەمپەیلە نییە."
