کۆنفرانسیگ ناودەوڵەتی لە سلێمانی: ئەزموونگەی ئاژانس شەفەق نیوز باوەڕ نێکریەێد
شەفەق نیوز/ شار سلێمانی لەماوەی رووژەیل ١٧ و ١٨ی ئی مانگ حوزەیرانە، میوانی کۆنفڕانس زانستی ناودەوڵەتی دوویەم زوان کوردی کرد، وە چەودیری هەڤاڵ ئەبو بەکر پارێزگار سلێمانی و وەڕێکخستن دامەزراو مارگرێت پەروەردەیی و رێکخراو خانی ئەرا تۆێژینەوەیل هویری.
کۆنفرانسەگە لە ژیر دروشم «زوان و یاسا» سازیا، وە بەشداریکردن بڕیگ لە ئەکادیمیایلە و پسپۆڕەیل یاسا و زوان لە هەرێم کوردستان و ئەو پارچەیل کوردستان لە تورکیا و ئیران و سوریا، و هەمیش بڕیگ لە رووشنهویرەیل و ڕۆژنامەوانەیل و پەیوەندیدارەیل وە باوەتەیل ژوان و کەلتوور کوردی.
فرەیدون سامان وەرپرس رێکخراو خانی ئەرا تۆێژینەوەیل هویری دووپات لە گرنگیدان وە زوان کوردی کرد چوینکە ناسنامەی کوردە، و گشت توانایل وەرەو دروسکردن زوانیگ ستاندار بکریەێد، ئەوەیش وە سوودگردن لەگشت زاراوە و شیوەزارەیل کوردی لە جووراجور ناوچەیل کوردستان، ئەراوە بانگواز ئەرا خاسترین ئاکادیمیایی و رووشنهویرەیل لە گشت پارچەیل کوردستان کریا، تا سوود لە ئەزموونەیلیان بگریەێد، وەتایبەت لە چین یاسا و ئەو دادگایلە ک هیمان باوەتەیلیان وە زوان عەرەوی نووسنن، ئیجا کریەێدە کوردی، یا قەت نێکریەێد.
کامیران رەحیمی نووسەر و رۆژنامەوانی و وەرگێڕانکار کوردی فەیلی لە شار ئیلام لە خوەرهەڵات کوردستان،لە وتاریگ باس دابەشکرن جوگرافی ئەرا زاراوەیل کوردستان و لەباوەت ئەزموون تایبەت خوەی لە سوودگردن لە زاراوەی کوردی فەیلی و گرنگی سوودگردن لەلی لە فەرهەنگ ئیستاندارد چوینکە زاراوەیگ دەوڵەمەنە لە ووشە و پێکهاتەی زوانی کوردی رەسەن، ک کاریگەری وە زوانەیل هاوسا نەوی.
وتیش؛ فرە لە خەڵک ناوچەی ئیلام و هاوسایلی وەگەرد کوردەیل فەیلی لە بەغداد لە ساڵەیل یەکەم بیناکردنی وە زوان فەیلی قسە کەن.
کامیران رەحیمی دەسخوەشی لە تەقەلایل گەورەی ئاژانس شەفەق نیوز ئەرا رووشنهویری و راگەیانن کورد فەیلی لە بەغداد کرد، و دووپات کرد ک شەفەق خوەی تەنیا دامەزراویگە ک توێنست کار گەورەیگ لەماوەی دویای رمانن رژیم بەعس لە عراق پێشکەش بکەێد
رەحیمی وتیش؛ ئەزموون دامەزراو شەفەق نیوز ئەزموونیگە ک توانای سوودگردن لەلی هەس ئەرا ئامادەکردن هەر کاریگ ک خزمەت پڕۆژەیل نەتەوەیی بکەێد، لەبان ئەو رەوشەیل زانریاگە ک بەغداد کەفێدە وەریان، ک هیلێد وە ئاسانی باوەڕ نەکریەێد ک ئەو هەمگەی کارە وە رەنجەیل کوردی فەیلی ئەنجام دا ک توێنست یەکەم گۆڤار وە زەوان کوردی فەیلی وە ناونشان «گوڵ سوو» بخەێدە وەردەس، هەمیش ئێزگەیگ و چوار زوان جیاجیا جوور کوردی سۆرانی و فەیلی و عەرەبی و ئینگلیزی پێشکەش کەێد.
