نەنگەساریێگ ئەڕا فیفا و دنیای تووپان

شەفەق نیوز- سی و چوار ساڵ وەر ژە یە، تەیارەێلەێ ئەرتش بەعس ، مەیدان تووپانێگ دە شار چەوار دە ئوستان ئیلام، بومباران کردن.

دە ئی کارەساتە نۆ گلە لە وازیکارەێلە ئوو یەک داوەر وەرد یەکێ لە تەماشاوانەێلە کوشریان و چەن کەسێ تریش شەل و کوتەو بین.

دە دریژای میژوو و دە گشت دنیا، تا ئێسە ئیجوورە بڵخەیێگ ئەونەنریاگە باوجی وە داخەوە نە دە روژژمێر فدراسیوون تووپان ئێران و نە دە روژژمێر فیفا، هێمان ک هێمانە ئیجوورە رووژێ نەنووسریاگە و رێزداری لەێ روژە نەدگرێ و ئی‌رووژە وە بێ‌کشە دیاێگ و دچوو ک یە ئەڕا فیفا و دنیای تووپان وە گشتی نەنگەسارییە.

کوشریاگەێلەێ ئی وازییە گشتێ ئایمەێل غەیرنزامی بین و نامێیان ئەیانەسە: حوسەین هەزاوە سەرمورەبی و کاپیتان تیم چەوار 28 ساڵان، و ئەو دووەێ وازیکارەێلەێ؛ سەێ‌موحەمەد زارعی 25 ساڵان، موجته‌با ناسری 22 ساڵان، یوونس تەلووکی 19 ساڵان، عەلی عەباسی 18 ساڵان، وازیکار ئیلامییەێلەیش ئەیانەن؛ جەهانگیر کاوه 19 ساڵان، موحەمەد کەماڵوەند 18 ساڵان، عەلی نجات کەرەمی 16 ساڵان، عەبدڕزاق مەهدیه 16 ساڵان، داوەر وازییەگە؛ حەمیدڕزا رزایەتی 19ساڵان، تەماشاوانەێلە؛ موراد ئازەرەخش 15ساڵان، ئەمجەد حەیدری 13 سالان، خەلیل موزەفەری 8 ساڵان، موحەمەدجەواد موزەفەری 7 ساڵان، سەجاد موزەفەری 5 ساڵان.