نێچیروان بارزانی و لوید ئۆستن رێک کەفن لەبان پشتگیریکردن حکومەت سودانی
![نێچیروان بارزانی و لوید ئۆستن رێک کەفن لەبان پشتگیریکردن حکومەت سودانی](https://media.shafaq.com/media/arcella/1678197608965.jpg)
نێچیروان بارزانی لە کۆنگرەیگ رووژنامەوانی هاوبەش وەگەرد لوید ئۆستن وەزیر وەرگری ئەمریکا دویای گردەوبیونیگ ناوبەینیان لە هەولێر وت: باس گرنگی پاڵپشتیکردن هیزەیل پیشمەرگە و هیزەیل عراق لە نواگردن ریخریاگ داعش کردیمن، و دووپات لە گرنگی وەردەوامی پاڵپشتیکردن ئەمریکا و رێکخستن وەزارەت پیشمەرگە کردیمن.
وتیش؛ دڵنیایان کردیمن ک ئیمە رکداریمن لە پڕۆژەی چاکسازی هیزەیل پیشمەرگە، و لاوردن ئەو ریگریەیلە ک لەنوای ئەوە وسیەن، هەمیش ئەوەسا لە تەقەلای چارەکردن گرفتەیل ناوخوەیی هەرێم کوردستان وەردەوام بویمن.
وتیش: رێک کەفتیمن لەبان ئەوە ک ناکۆکیەیل ناوبەین هەولێر و بەغدا وەگەردی کپی و ئارامی ئەمنی و سیاسی و ئابووری لە عراق کەفێدە دەس.
هەمیش وت: رێک کەفتیمن لەبان گرنگی پاڵپشتیکردن حکومەت عراق و کارکردن وەیەکەو لە ناوچەکە ئەرا مقیەتیکردن ئارامی، وتیش: دووپات کردیمن ک هەرێم کوردستان هەر جویر کاریگەریگ ئەرا کپی و ئارامی مینێد.
نێچیروان بارزانی وە وەزیرەگە وت: سوپاس لە دەور ئیوە کەیمن لە دەسمیەتیداین پیشمەرگە، و سوپاس لە ئەمریکا کەیمن ئەرا ئەو پاڵپشتیکردن وەردەوامە ئەرا عراق و هەرێم کوردستان، وتیش: بەرژەوەنی هاوبەش، و پشتبەسان وەیەکتر وەگەرد ئەمریکا گردمان کەێدەو، و وەیەکەو توەنیمن مقیەتی ئاسایش و ئارامی لە عراق بکەیمن، و مقیەتی بەرژەوەنیەیل بکەیمن.
لەلای خوەییش، ئۆستن لەناو کۆنگرەگە وت: وەیەکەو لە وەختەیل سەختیگ کار کردیمنە، و وەشیوەیگ هاوبەش لە نواگردن ریخریاگ داعش، وتیش: ئەمریکا و حکومەت فیدڕاڵی و هەرێم کوردستان کار ئەرا گلەوداین سەروەری عراق کردن.
دووپات کرد ک ئەوەسا وەردەوامی وە جەنگ دژوە ریخریاگ داعش دەیمن، و هیزەیل پیشمەرگە وەگەرد هیزەیل عراق و ئەمریکا وەیەکەو نوای ریخریاگ داعش گڕدن، وتیش: ئەوەسا لە عراق مینیمن، و ئیمە وەمکیس حکومەت عراق ئەرا نواگیری داعش هایمنە ئیرا.
باس وەردەوامی واشینتۆن لە پاڵپشتیکردن هیزەیل پیشمەرگە و هیزەیل عراق وە گشت چینەیلی کرد، و دووپات لە پاڵپشتیکردن یادداشت لەیەکڕەسینەوەی ستراتیژی ناوبەین وەزارەت پیشمەرگە و وەزارەت وەرگری ئەمریکا کرد، ک باس پاڵپشتیکردن ئەمریکا ئەرا هیزەیل پیشمەرگە کەێد.
وەزیر وەرگری ئەمریکا وتیش: پشتگیری لە هاوکاری ناوبەین پیشمەرگە و هیزەیل عراق کەیمن، و دروسکردن لیوایگ هاوبەش ناوبەینیان، و لە تەقەلا وەردەوامیمن ئەرا ئەوەی هەرێم کوردستان و عراق بڕەسنە رێککەفتنیگ ناوبەینیان.
دووپات کرد ک هیمان داعش مەنیە و رخیگ لەبان ژیان دانیشتگەیل و گشت ناوچەگە دیرێد، و شایەت دووارە ریخریایەگە لە عراق گلەو بخوەێد، و داوا لە هەولێر و بەغدا کرد هەماهەنگی وەوە بکەن ک کەفێدە بەرژەوەنی گەل عراق.