نێچیروان بارزانی چەوی کەفێدە شاه چارلز سێیەم و سەرخوەشی وە مردن شاژن ئێلیزابێت لەلی کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، چەوی کەفتە چارلز سێیەم شاە بەریتانیا.
بارزانی لەبان هەژمار تایبەت خوەی لە تویتەر نویسان: لە چەمەری فەرمی شاژن ئێلیزابێت دویەم لە دێر ویستمنستەر لە لەندەن ئامادە بویم تا رێزم ئەرا شاژن کووچکردگ پیشکەش بکەم.
وتیش: شاژن سەرچەوەی بەهرەمەنی راسییگ بوی ئەرا کەسەیل فرەیگ لە گشت جەهان.
بارزانی وتیش: هەمیش دویەشەو شەرەفمەن وە دیدار شاه چارلز سێیەم لە کۆشک باکنگهام بویم، و سەرخوەشی لەلی کردم.
هەرلیوا، سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: دویای تەواوبوین رسوومەیل دانیشتن پرسەی مردن شاژن کووچکردگ ئێلیزابێت دویەم لە ویستمنستەر ئابی لە پەرلەمان بەریتانیا، سەرۆک نێچیروان بارزانی، دویای نیمەڕو ئمڕوو دووشەممە ١٩ی ئەیلوول ٢٠٢٢، لە رسوومەیل پیشوازیکردنیگ بەشداری کرد ک بەڕێز جەیمس کلیڤرلی وەزیر دەرەوە ئەرا بەشداربویەیل لە رسوومەیل پرسەگە و ماڵئاواییکردن لە شاژن کووچکردگ رێکی خست، ئەوەیش لە چیرش هاوس لە لەندەن.
بەیاننامەگە وتیش: سەرۆک نێچیروان بارزانی پرسە و سەرەخوەشی وەمردن شاژن کووچکردگ لەناو دەفتەر پرسەنامەگە نویسان.
بەیاننامەگە هەمیش وت: لە ماوەی دوو رووژ لە سەردان لەندەن وە جیوەجیکردن مکیسیگ فەرمی لەلایەن حکومەت بەریتانیا، سەرۆک نێچیروان بارزانی وەگەرد سەرکردە و ریبەرەیل دەوڵەتەیل جەهان لە رسوومەیل پرسە و ماڵئاواییکردن لە تەرم شاژن ئێلیزابێت دویەم بەشداری کرد.
