نێچیروان بارزانی وەگەرد عەبدولمەهدی و حەکیم گردەو بوود
شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، وەگەرد عادل عەبدولمەهدی سەرۆک وەزیرەیل وەرین، و عەمار حەکیم سەرۆک ڕەوت حیکمە لە بەغداد پایتەخت وەجیاجیا گردەو بوی.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: بارزانی و عەبدولمەهدی لە دیداریان باس را و نووڕینەیلیان لەباوەت گەشە و رەوشەیل وڵاتەگە وە شیوەی گشتی کردن، و باس گرنگی پاڵپشتیکردن حکومەت عراق و سەرکەفتن بەرنامەی وەزارەتی کردن، وەو شیوە ک ماف گشت پیکاتەیل وڵاتەگە مسۆگەر بکەێد، و داوا و تەمای هاووڵاتییەیل جیوەجی بکەێد.
هەردوگ لایەنەگە دووپات لە گرنگی پشتیەکگردن و هاوکاری هاوبەش ناوبەین گشت هیز و لایەنەیل عراق کردن ئەرا چارەکردن گرفتەیل وڵاتەگە و مقەیەتیکردن ئارامی و سەروەری عراق.
بارزانی و حەکیم، لە بەیاننامەیگتر، لە دیداریان دووپات لە گرنگی پشتیەکگردن و هاوکاری و لەیەکڕەسەونەی هاوبەش ناوبەین لایەنەیل سیاسی و پیکاتەیل عراق کردن، و نواگردن سەختیەیل ئی قۆناغە ک وڵاتەگە وەپی رەد بوود، و پاڵپشتیکردن حکومەت فیدراڵی نوو، تا بتوەنێد بەرنامەی وەزارەتی وە سەرکەفتن جیوەجی بکەێد.
هەردوگ لایەنەگە هاوڕا بوین ک ئی قۆناغە و رەوشەیل وڵاتەگە لە دەسەڵات و لایەنەیل پەیوەندیدار لە عراق و هەرێم کوردستان خوازێد وەرپرسایەتی هاوبەش وەیەکەو هەڵگرن، و هاوکاری ئەرا چارەکردن گرفتەیل وڵاتەگە بکەن، لەناویان ناکۆکیەیل ناوبەین هەولێر و بەغدا و مقەیەتیکردن ئاسایش و ئارامی و سەروەری عراق.
