نێچیروان بارزانی وەگەرد حکومەت سلێمانی گردەو بوود.. وینە
شەفەق نیوز/ سەرۆک حکومەت خۆجێی لە پارێزگای سلێمانی، هەڤاڵ ئەبوبەکر، رووشنایی خستە بان گرنگترین تەوەرەیل کە لەناو گردەوبوینیگ وەگەرد نێچیروان بارزانی، سەرۆک هەرێم کوردستان، کە شەوەکی ئمڕوو سێشەممە سەردان پارێزگاگە کرد.
ئەبوبەکر لە وتاریگ کە دویای گردەوبوینی وەگەرد سەرۆک هەرێم ئەرا رووژنامەنویسەیل وت: نێچیروان بارزانی وەگەرد حکومەت خۆجێی لە دیوان پارێزگا گردەو بوی، وتیش؛ “باس لەو کارەیلە کرد کە حکومەت خۆجێی وە ئەنجام رەسانیە، و ئەو پاڵپشتیەیلە پیشکەش کریانە لەلایەن سەرۆکایەتی هەرێم کوردستان و حکومەت هەرێم و حکومەت فیدراڵی ئەرا پارێزگاگە”.
وتیش: "لەلاییگ ترەک سەرۆک هەرێم کوردستان وەگەرد دەزگا ئەمنی و خزمەتگوزارییەیل و لایەنە پەیوەندیدارەیل لە پارێزگای سلێمانی گردەو بوی" وتیش؛ نێچیروان بارزانی پاڵپشتی خوەی ئەرا کارەیل حکومەت خۆجێی و ئەو وەرپرسەیلە نشان دا لە بەش و دامەزراوەیل سلێمانی.
ئەبوبەکر وتیش؛ "ئەوە باسی لەلی کریا، لە پلەی یەکەم، مقیەتیکردن ئاسایش و سەقامگیری هەرێم کوردستان بوی، وەتایبەتی وەگەرد دەسکردن وە یەکەم رووژ بانگەشەی هەڵوژاردن ئەرا هەڵوژاردن پەرلەمان کوردستان لە هەرێم کوردستان، لە سوو چوارشەممەو."
هەمیش وت: "داوا لە سەرۆکایەتی هەرێم کردم کە گردەوبوین خولیی وەگەرد لایەن و هیزە سیاسییەیل، وەرد فەرمانگە و دامودەزگایل حکومەت، وەرد پارێزگارەیل، و وەگەرد ئەو گروپەیلە لە ناو کۆمەڵگا کە ماف خوەیانە دەنگ بیەن، و تا وەپییان بکریەێد". بەرنامە و وتارەیلی نیشتمان یەکگرتگ بوود، و ئەرا گشتمان لەی بەرنامە بویمن”.
وتیش: "پرسه گرنگەگەی ترەک ئەرا ئیمه ئەوەسە کە پەیوەندیی وە فڕۆکەخانەی ناودەوڵەتی سلێمانییه دیرێد، و داوا له سەرۆک هەرێم کرد ئەو قەیەغە هەڵبگرێد کە لەلایەن تەرکیا وەبان فڕوکەخانەگە چەسپیاس".
ئەبوبەکر لە درویژەی قسەیلی وتیش: "فڕۆکەخانەی ناودەوڵەتی سلێمانی نزیکترین خاڵە کە باشوور خوەرهەڵات ئاسیا وە ئەوروپا بەسێدەو، کە هامشوو ئاسمانی فرەس"، وتیش: "فڕۆکەخانەگە فرە نزیکە لە هەولێر و تورکیا و دۆحە و دوبەی".
دیاری کرد کە"داوا لە سەرۆکایەتی هەرێم کردیمن کەناڵەیل دانوسەنین وەرد تورکیا واز بکەێد لەباوەت پەلامارەیل ئی دواییە کە زیان وە و باخ و بوویسن و ماڵ و دارایی خەڵک مەدەنی ناوچەگە رەسانیە"، دووپات لەبان گرنگی دانوسەنین وەرد تورکی لە روانگەی ئەمنی و سەربازی و سیاسییەو کرد ئەرا وسیان ئی پەلامارەیلە.
پارێزگار سلێمانی لە کۆتایی قسەیلی وتیش: باس لەو راسیە کردم کە سلێمانی رییگ ستراتیژی ژیانی دیرێد، کە کەفێدە مەرز ناودەوڵەتی باشماخەو، و چۆنیەتی خاسترکردن ئی ریە ئەرا قایمکردن جویلەی بازرگانی”.
لەلای خوەییش دەسەی سەرۆکایەتی هەرێم کوردستان لە بەیاننامەیگ دووپات کرد کە سەرۆک نێچیرڤان بارزانی، وەگەرد هەڤاڵ ئەبوبەکر پارێزگار سلێمانی و شمارەیگ وەرپرس یەکە ئیدارییەیل پارێزگاگە گردەو بوی.
وەگورەی بەیاننامەگە، لە دیدارەگە باس رەوشەیل گشتی پارێزگای سلێمانی وەتایبەت لە ئاست ئیداری و خزمەتگوزارییەیل کریا، هەمیش ئامادەکارییەیل ئەرا ئەنجامدان ھەڵوژاردن پەرلەمان کوردستان و دەسکردن وە بانگەشەی ھەڵوژاردن، و رووشنایی خریا بان داواکاریی شمارەیگ پڕۆژەی ناو پارێزگای سلێمانی.
نێچیرڤان بارزانی دووپات لە گرنگی سەرکەفتن هەڵوژاردن و پڕۆسەی دەنگدان کرد، و لەبان گرنگی ئەنجامدان بانگەشەی هەڵوژاردنی شارستانی لە سلێمانی و تەواوی هەرێم کوردستان.
هەرلیوا، سەرۆک هەرێم کوردستان پاڵپشتی خوەی ئەرا ئیدارەی پارێزگاگە نشان دا و بڕیاردا شمارەیگ لە داواکارییەیل جیوەجی بکریەێد.
چۆنیەتی پەرەپیدان سێکتەرە جیاجیایل پارێزگای سلێمانی و تەقەلای چارەسەرکردن گیچەڵەیل فڕۆکەخانەی ناودەوڵەتی سلێمانی و چەن تەوەریگ ترەک کە پەیوەندی وە کاروبار پارێزگار سلێمانی دیرن، تەوەرەیل ترەک دیدارەگە بوین.
