نێچیروان بارزانی وەگەرد باڵیۆز فەرەنسا و ئەڵمانیا گردوو بوود
![نێچیروان بارزانی وەگەرد باڵیۆز فەرەنسا و ئەڵمانیا گردوو بوود](https://media.shafaq.com/media/arcella/1674394085796.jpeg)
ئەوەیش لە مەوقەی پیشوازیکردن نێچیروان بارزانی سەرۆک هەرێم کوردستان، نیمەڕو ئمڕوو، لە ئێریک شوفالێە باڵیۆز فەرەنسا لەلای عراق و کانت بیگەر باڵیۆز ئەڵمانیا و شاند یاوەریان.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە گردەوبیونەگە باس پەیوەندیەیل هەرێم کوردستان وەگەرد فەرەنسا و ئەڵمانیا کریا، و رەوشەیل ناوخوەیی هەرێم کوردستان، و رەوشەیل عراق و بەرنامەی حکومەت فیدڕاڵی عراق، و پەیوەندیەیل هەولێر و بەغدا و تەقەلایل چارەکردن گرفتەیل گیرهاتگ ناوبەینیان، و باوەت وزە و توانا و پایەی هەرێم کوردستان لەی چینە.
بارزانی وەگەرد شاندە میوانەگە هاوڕا بوین لە گرنگی پاڵپشتیکردن حکومەت فیدڕاڵی لە جیوەجیکردن بەرنامەی وەزارەتیی، وەگورەی ئەوەگ لەناو رێککەفتن لایەنەیل سیاسی لە دروسکردن ئی حکومەتە هات، و گشتی لەبان گرنگی یەکڕزی لایەنەیل سیاسی لە هەرێم کوردستان دووپات کردن.
هەردوگ باڵیۆز فەرەنسا و ئەڵمانیا باسیگ لە پڕۆژەی دروسکردن پەیمانگای دویارووژ روشنهویری فەرەنسی - ئەڵمانی لە هەولێر پیشکەش کردن، ک لە شەسەمین ساڵیاد پەیماننامەی ئیلیزێە کریەێد، و دووپات لە ئارەزوو وڵاتیان ئەرا قایمکردن پەیوەندیەیلیان وەگەرد هەرێم کوردستان لە گشت چینەیل کردن ، وەتایبەت لە چین کەلتوری.
لەلای خوەییش، سەرۆک هەرێم کوردستان سوپاس هەرێم کوردستان ئەرا ئەو دەسمیەتیەیلە رەسان ک فەرەنسا و ئەڵمانیا لە چینەیل سیاسی و سەربازی و ئابووری و مرۆیی و کەلتوری پیشکەشی کردنە، وەگەرد نیشاندان خوەشهاڵی و دەسخوەشی لە داناین سەنگ بنەڕەتی ئەرا پەیمانگای کەلتوری فەرەنسی - ئەڵمانی لە هەولێر، و بارزانی باس ئی پڕۆژە وە گام گرنگیگ کرد ئەرا قایمکردن پەیوەندیەیل کەلتوری فەرەنسا و ئەڵمانیا وەگەرد هەرێم کوردستان.