نێچیروان بارزانی وەگەرد باڵیۆز بەریتانی باس چەن باوەتیگ کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، وەگەرد مارک بریسۆن ریچاردسون باڵیۆز بەریتانیا لەلای بەغداد، باس بڕیگ لە باوەتەیل کرد ک خاوەن گرنگی هاوبەشن لە چین ناوخۆیی عراق و پەیوەندیەیل ناوبەین دوو وڵاتەگە.
ئەوەیش لە دیداریگ لەناوبەین سەرۆک بارزانی وەگەدد ریچاردسون هات.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس دۊیاترین گەشەیل رەوش سیاسی، و هەڵبژاردن دەزگای سەرۆکایەتی ئەنجومەن نۊنەرەیل عراق، و گفتوگۆەیل لایەنە سیاسیەیلە دەربارەی گامەیل هاتگ لە کار سیاسی، و پەسەنکردن سەرۆک کۆمار، و دروسکردن حکومەت، و پەیوەندیەیل ناوبەین هەولێر و بەغداد، و پەیوەندی بەریتانیا وەگەرد عراق و هەرێم کوردستان کریا.
سەرۆک نێچیروان بارزانی دووپات لە گرنگی ئارامی سیاسی لە عراق کرد، و هەمیش هەسی بڕوایی و لەیەکڕەسین هاوبەش ئەرا لایەن و پێکاتەیل لە وڕیەوبردن کار سیاسی ئیسە، ئەرا وەدەسهاوردن ئایندەیگ خاستر ئەرا وڵاتەگە.
بەیاننامەگە وتیش: هەردگ لایەنەگە رێک کەفتن لەبان گرنگی یەکڕزی لایەنە سیاسیە کوردستانیەکان لە بەغداد، و باس لە ئومیدیان کرد ک گفتوگۆ و تەقەلایل هێزە سیاسیەیلە و لەیەکڕەسین هاوبەش بڕەسێدە وەدەسهاوردن ئارامی سیاسی، و هەمیش باس برادەرەیل عراق کردن لە گرنگییان ئەرا گفتوگۆەیل سیاسی عراق.
بەیاننامەگە وتیش: باڵیۆز بەریتانیا لە عراق، دووارە پاڵپشتی وەردەوام وڵاتەگەی ئەرا کارکردن وەگەرد عراق و هەرێم کوردستان نووە کرد، و سوپاس لە سەرۆک نێچیروان بارزانی کرد ئەرا ئەو دەوریە لە چاکسازی وەزارەت پێشمەرگە، و دووپات لە وەردەوامی بەریتانیا ئەرا پشتگیریکردن لە رێکخستن هێزەیل پێشمەرگە کرد.
لە دیدارەگە، رەوش ئەمنی دۊیایین، و پەلاماردان بارەگایل شاندەیل دیبلۆماسی، و لایەنە سیاسییەیل لە بەغداد، و رەوش ڤایرۆس کۆرۆنا، و رەوشەیل ناوچەگە وەگشتی، باوەتەیلیگ تر بۊین لەو گردەوبۊنە، ک قونسڵ گشتی، و راوێژکار وەرگری لە قونسڵیەی گشتی بەریتانیا لە هەولێر ئامادەی بۊین.
