نێچیروان بارزانی وە دیداریگ وەرد وەزیر دەیشت وڵاتەگە دەسوە سەردانەگەی ئەرا نەمسا کەێد
نێچیروان بارزانی دویەکە دووشەممە، رەسیە ڤیێنای پایتەخت وە سەردانیگ فەرمی، کە لەناوی چەوی کەفێدە سەرۆک کۆمار و وەزیر دەیشت نەمسا، و وەگەردیان باس دەرفەتەیل و چینەیل قایمکردن پەیوەندییەیل نەمسا وەرد عراق و هەرێم کوردستان کەن، و فراوانکردن ئاسووەیل هاوکاری هاوبەش ناوەین هەردوگ لایەن.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: هەردوگ لایەن لە دیدارەگە دووپات لەبان قایمکردن پەیوەندییەیل نەمسا وەرد عراق و هەرێم کوردستان کردن، زەنایلەت لە چین ئابووری و بازرگانی، و رووشنایی خستنە بان رەوشەیل سیاسی لە عراق و هەرێم کوردستان و لەبان رۆڵ نەمسا لە چوارچیوەی هاوپەیمان ناودەوڵەتی ئەرا لەناوبردن داعش.
بەیاننامەگە وتیش: وەگەرد باسکردن لە خوەشاڵیی وە سەردانەگە، نێچیروان بارزانی ئافەرین لە پەیوەندییەیل میژووی نەمسا وەرد هەرێم کوردستان کرد، و رێز و سوپاسی ئەرا هاوکاری و پاڵپشتیکردن نەمسا ئەرا کەل کوردستان و مافەیل رەوای لە مەوقە سەختەیل پیشکەش کرد.
لەلای خوەییش، وەزیر دەیشت نەمسا باس خوەشاڵیی وە سەردان سەرۆک نێچیروان بارزانی و ئاست پەیوەندییەیل وڵاتەگەی وەرد عراق و هەرێم کوردستان کرد.
هەردوگ لایەن باس بەرزکردن ئاست نوێنەرایەتی نەمسا لە هەرێم کوردستان، و پەیوەندییەیل هەولێر و بەغدا، و ڕەوش ئاوارە و پەنابەریل لە هەرێم کوردستان و مەترسیەیل داعش، وەگەرد بڕیگ باوەت گرنگ لەلای هەردوگ لایەن کردن.
بەیاننامەگە وتیش: باڵیۆز کۆمار عراق و نوێنەر حکومەت هەرێم کوردستان لە نەمسا ئامادەی دیدارەگە بوین.
