نێچیروان بارزانی و باڵیۆز ئەڵمانیا یاد "هەڵوژاردن تەشرین" کەن و باس دروسکردن حکومەت
شەفەق نیوز/ نێچیروان بارزانی سەرۆک هەرێم کوردستان، و مارتن بیکەر باڵیۆز ئەڵمانیا لەلای عراق، ئمڕوو دووشەممە، باس تەقەلایل دروسکردن حکومەت نوو عراق کردن.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: هەردوگ لایەنەگە باس رەوشەیل عراق و رەدبوژن ساڵیگ وە تەواوی لە ئەنجامداین هەڵوژاردن وەرجەوەت لە وڵاتەگە، و تەقەلایل ئەرا چارەکردن بەسیان سیاسی و دروسکردن حکومەت نوو کردن، و بارزانی لە دیدارەگە دەسخوەشی لە دەور حکومەت ئەڵمانیا لە دەسمیەتداین عراق لە جەنگ دژوە تیرۆر کرد، وهەمیش درویژلردن ماوەی مەنین هیزەیل ئەڵمانیا لە عراق.
هەردوگ لایەنەگە دووپات لە گرنگی قایمکردن پەیوەندیەیل دووانی ناوبەین هەرێم کوردستان و عراق و حکومەت ئەڵمانیا کردن، وگرنگی وەردوامبوین پاڵپشتیکردن کۆمەڵگای ناودەوڵەتی و دروسکردن حکومەتیگ خوازینەیل هاووڵاتییەل عراق جیوەجی بکەێد.
هەردوگ لایەنەگە، هەمیش باس پەیوەندیەیل ناوبەین هەولێر و بەغدا و ناوبەین عراق و دەوڵەتەیل هاوسا کردن و چەن باوەتیگتر.
شەوەکی ئمڕوو، موستەفا کازمی سەرۆک حکومەت عراق، یاد رەدبوین ساڵیگ لەبان هەڵوژاردن گشتی لە وڵاتەگە کرد، و وە ئەنجامداین گرنگترین بەند لە بەرنامەی حکومەتی دادەی قەڵەم، و داوا لە حزب ولایەنەیل سیاسی کرد ئەرا گفتوگۆ عاقڵانە و ئارامیگ ئەرا چارەکردن قەیران سیاسی.
هەمیش شاند نەتەوە یەکگرتگەیل لە عراق (یۆنامی) یاد هەڵوژاردن تەشرین ٢٠٢١ کرد، و وت: بی ئومیدییگ و بەشبەشی تاڵیگ پەیا کرد، و داوا لە هیزەیل سیاسی کرد وەرپرسایەتی خوەیان هەڵگردن و بچنە ناو گفتوگۆ بیمەرجیگ.
