نێچیروان بارزانی هوشداری لە ئاڵشتبوین کەشوهەوا لەبان عراق دەێد
لەناو ئەو دیدارە ک هەرلە محمد شیاع سودانی سەرۆک وەزیرەیل عراق، و بڕیگ لە گەورە وەرپرسەیل و کەسایەتیەیل سیاسی و ئەکادیمی و تۆێژینەر و رووژنامەوانەیل ئامادەی بوین، سەرۆک نێچیروان بارزانی وتاریگ پیشکەش کرد لەناوی باس رەوشەیل عراق و هەرێم کوردستان و سەختی و دەرفەتەیل لەنوای کرد، و دووپات لە گرنگی کار هاوبەش و یەکڕزی و دووسی و جیوەجیکردن دەستوور کرد، و نێچیروان بارزانی لەناو وتارەگە هوشداری لە کاریگەری ئاڵشتبوین کەشوهەوا لەبان عراق کرد، و داوای جیوەجیکردن گفتوگۆەیل وەرد تورکیا و ئیران کرد ئەرا سووکەوکردن زەرەدەیل ئی ئاڵشتبوینە و کەمئاوی لەبان وڵاتەگە.
ئاژانس شەفەق نیوز دەق وتارەکەی سەرۆک هەرێم کوردستان لە دیدار سلێمانی بڵاو کەێد:
ئامادەبویەیل بەڕێز..
دەوڵەت سەرۆک وەزیرەیل عراق..
بەڕێز سەرۆک ئەنجومەن دادوەری باڵای عراق..
شەوەکیدان وەخوەش
پیشوازی لە گشت ئیوە کەم، و سوپاس لە برای بەڕێز د. بەرهەم ساڵح و سەرۆکایەتی زانکۆی ئەمریکی لە عراق - سلێمانی کەم، ئەرا وەردەوامی لە ڕیکخستن دیدار ساڵانەی سلێمانی.
لە ساڵیاد تاوان کیمیاوارانکردن هەڵەبجە، وە رێز نەوازش سەر ئەرا گیانە پاکەیل شەهیدەیل چەمنم، ک گشتمان قەرزار قوربانیەیل خەڵک هەڵەبجەیمن، وە ماوەی ساڵەیل رەنجەیل فەریگ دایمن تا هەڵەبجە بوودە پارێزگا، و تا قەرەبووی بکریەێد و خزمەتگوزاری وە خەڵکەگەی پیشکەش بوود.
وەناو خوەم و خەڵک هەڵەبجە، سوپاسیگ تایبەت لە برای ئازیزم محمد شیاع سودانی سەرۆک وەزیرەیل عراق فیدڕاڵ کەم، ک وە دڵسووزی کار ئەرا تەواوکردن ریکارەیل کرد، هەمیش سوپاس لەوانە کەم ک وەرجەیە لە هەرێم کوردستان و عراق کار ئەرا ئاڵشتکردن هەڵەبجە ئەرا نۆزدەهەم پارێزگا لە عراق کردن.
و داوا لە حکومەت فیدڕاڵ کەم بوودجەیگ تایبەت ئەرا دووارە ئاوەدانکردن هەڵەبجە تەرخان بکەێد و قەرەبووکردن خاوەن قوربانیەیل و زەخمدارەیل.
تەقەلایل حکومەت فیدڕاڵی و دەوڵەت سەرۆک وەزیرەیل لە گرنگیدان وە هەڵەبجە و قەرەبووکردن زەرەدمەنەیلی، گامیگ دەستووریە بڕیارەیل دادگای تایبەت وە تاوانەیل رژیم وەرین پاڵپشتیی کەن، یە کاریگ وەتەواوی دەستووریە و یاساییە ئەرا بەرژەوەنی خەڵک هەڵەبجە.
ئامادەبویەیل بەڕێز..
ئیمە لە هەرێم کوردستان، پشتگیری حکومەت و گامەیل دەوڵەت سەرۆک وەزیرەیل عراق فیدڕاڵی وە گشت پشتگیریکردنیگ کەیمن، ک لەوەختیگ دەس وە ئەرکەیل پۆستەگەی کردگە، و لە بنەمای رێککەفتن هاوپەیمان وەڕیەوبردن دەوڵەتەگە ئەرا دروسکردن ئی حکومەتە ک نەخشەی ریەگە ئەنجامی دا، تەقەلا دا تا کەشوهەوایگ سیاسی ئارامیگ لەناو عراق دروس بکەێد، هەمیش گرنگی وە گشت ناوچە و پیکاتەیل عراق دا، و ئومید لەلی دیریمن ئی رێککەفتن و یاسایلە جیوەجی بکەێد.
بيس ساڵ لە ئۆپراسیۆن ئازادکردن عراق رەد بوی، و ئی دیدارە دەرفەت خاسیگە ئەرا هەڵسەنگاندن گرنگیگ سوودیگ ئەرا بانان داشتوود، باوجی فرە گرنگە هەڵسەنگاندن بکریەێد دویر لە توومەتبارکردن ئەوەکان لەبان شکستەیل، چوینکە ئی شیوەی رەفتارە سوودیگ نەیرێد، ک گشت ئیمە دەسمان هاناو ئەو شکست و سەرکەفتنەیلە چ فرە بوود یا کەم.
بیس ساڵ دویایین، لەبان گشت کەمیەیل، لە رووژەیل دیکتاتۆری جیاوازی داشتن، هەر لەلای کەمەو گەل عراق ئازادی وەکار هاورد تا گورجی خوەی لە ناوچەگە نشان بەێد، قۆناغ ئۆپۆزسیۆن عراقی هەرلە کۆنگرەی لەندەن و سەڵاحەدین سەرکەفتگ بوی، ئیجا دروسکردن حکومەت و نویسانن دەستوور ، وەلێ دویای ئەوە، دەسکریا دەرچگن لە کڕەگە، و هەڵەیل کەمکەم کەفتنە شوین یەک، تا بویە قەیرانەیل گەورەیگ، ئەوەیش لەوەر نەوین گفتوگو بیناکەر ناوبەین لایەنەین و جیوەجینەکردن دەستوور عراق.
کۆمەڵگای شارستانی و مافەیل شارستانی گەل و ژنەیل وەتایبەت زەرەدەیل گەورەیگ وەپیان رەسێد، و یەیش ریکری گەورەیگ خستە بان ری پیشکەفتن کۆمەڵایەتی و ژیانیگ سەردەمیانە لە عراق، و زەرد گەورەیگ رەسانە تاوانەیل عراقیەیل.
فرەیی ناوەندەیل بڕیار و وەکارهاوردن چەک دەوڵەت لە ناکۆکیەیل سیاسی ناوخوەیی، و ویرانکەر بڕوایی پیکاتەیل وە یەکسانی و هاوبەشی لە بڕیار و لە وەڕیەوبەردن وڵاتەگە، زەرەد فرەیگ رەسانە کار سیاسی و وە دامودەزگایل عراق.
ئەوانەگ دەستوور نویسان، لە جویراجویر سەرچەوەیل هویرکردن بوین، و لە نەتەوە و پیکاتەیل هەمەڕەنگ عراق بوین، هەرچەگ خوەیان داوا کەن لەناو دەستوور نەنویسانن، و گشت داوایان نەچەسپانن، وەلێ گشتیان باوەڕ داشتن ک دەستوور خاسیگ نویسانە ک توەنێد بیلێد عراق بوودە وڵات گشتی، و بکەێدەی عراقیگ فیدڕاڵ و دیموکراتی و پیشکەفتگ.
وەداخەو ک دەستوور جیوەجی نەکریا، ک لە ساڵ ٢٠١٧ دەسەیگ پسپۆڕ لە هەرێم کوردستان ٥٧ مادەی دەستووری دیاری کرد ک پەیوەندی وە سیستەم فیدڕاڵی و مافەیل هەرێم کوردستان دیرن، تا ئیسە هویچیگ لەلیان جیوەجی نەکریا، ئەراوە گەل هەرێم کوردستان هەس نیەکەێد ک سیستەم فیدڕاڵی لە عراق جیوەجی کریاگە، ک ئەگەر فیدڕاڵی وەگورەی دەستوور جیوەجی بکریاد، وەنە گەل هەرێم کوردستان و گشت عراق ئیرنگە هەس وە یەکسانی و هاوبەشی راسی کرد.
فرە هەس توومەتبار هەرێم کوردستان وە جیوەجینەکردن دەستوور کەن، و ئیمە دویای بیس ساڵ، نیەوشیمن ئیمە لە هەرێم کوردستان هەڵە نەیریمن، گشتمان لە عراق هەڵە کردیمن، وەلێ بایەتە لە هەڵەیل گوزەشتە یای بگریمن.
سەرۆک مەسعود بارزانی و رەحمەتی سەرۆک مام جەلال تەقەلای فرەیگ دان تا دەستوور جیوەجی بکریەێد.
بەڕێزەیل..
ئاڵشتبوین کەشوهەوا وەگەرد ساڵ ٢٠٥٠ ناچار یەک ملیار و دووسەد مەلیۆن کەس کەێد ماڵ خوەیان بیلنەجی، وەداخەو تۆێژینەوەیل بانک ناودەوڵەتی و نەتەوە یەکگرتگەیل عراق خەێدە ناو پەنج دەوڵەت ئەوەسا فرەترین زەرەد وەپیان رەسێد.
ئی باوەتە جددیە و فرە گرنگە، و بایەتە گفتوگو لەناومان زیای بوود وەخاتر پەیاکردن چارەیلیگ، و هەمیش بایەتە گفتوگۆەیل فرەیگ وەرد دەوڵەتەیل ناوچەگە بکەیمن، وەتایبەت تورکیا و ئیران، وەخاتر سووکەوکردن زەرەدەیل ئی ئاڵشتبوینە و کەمئاوی لەبان عراق، ئەو کۆنگرە ک لە هەفتەی گوزەشتە لە بەسرە وەڕیەو چگ و پاڵپشتیکردن نەتەوە یەکگرتگەیل و دەوڵەتە برادەرەیل ئەرا بەرنامە و گامەیل عراق جی دڵخوەشیە.
لەو هەڕەشەیلتر لەبان عراق، پشتبەسان وە نەفتە جویر سەرچەوەیگ سەرەکی ئەرا داهات، ک لە ئەنجام ئاڵشتبوین کەشوهەوا و تەقەلای زوی وەزوی ئەرا ئاڵشتکردن سەرچەوەیل وزە و شیوەی رەفتارکردن لە جەهان، گیان گەل عراق لە بانان کەفێدە وەر رخ فرە گەورەیگ، وەتایبەت ک هەشمار دانیشتگەیلی ئەوەسا فرە بەرزەو بوود ، و بەش خەرجکردن وەکارخستن لە بوودجە، بار حکومەت ئەرا پلەی گەورەیگ سەنگینەو کرد.
ئامادەبویەیل بەڕێز..
عراق دەوڵەمەنی مرۆیی و سرووشتی گەورەیگ دیرێد، و توانای وەکارهاوردنی وە خاسترین شیوە هەس، تا بوودە یەکیگ لە دەوڵەتە پیشکەفتگەیل، و پا لەو شوین و پلەی خوەیە قایم بکەێد ک شایستەی خوەیە لە ناوچەگە و لە جەهان.
ئەرا ئیجویر عراقیگ ک تەما وەپی دیریمن، بایەتە عراقيەیل وە گشت پیکاتەیلیان وەیەکەو کار بکەن، و وەرپرسایەتی هاوبەش هەڵگرن، و گشتمان یەک ئەژندا و ئامانج نیشتمانی عراقی گردمانەو بکەێد، ک مقیەتی بەرژەوەنیەیل باڵای وڵاتەگە بکەێد.
لەسای رەوشەیل سیاسی و ئەمنی و ئابووری ئیسە لە ناوچەگە و لە جەهان، عراق و هەرێم کوردستانیش لەناوی، کەفێدە وەر سەختیەیل و دەرفەتەیل گەورەیگ، ئیرنگە، وەخت ئەوەسە گفتوگۆ ئاشکرا و ویرەدار بکریەێد، وەخت ئەوەسە ک بایەتە گشتمان وەیەکەو بنووڕیمنە بانان وە نووڕینیگ هاوبەش.
لە هەرێم کوردستانیش، بایەتە ناکۆکیەیل وە هەس و یەکڕزی و پشتیەکگردن و یەکدەسی چارە بکەیمن، و لای باوەتە ئەو تەقەلا و گامەیل لایەنەیل سیاسیە ئەرا لاوردن ریگریەیل لەنوای ری هەڵوژاردن، جی دڵخوەشیە.
ئیمە لە سەرۆکایەتی هەرێم کوردستان، ئەوەسا هەر وەردەوام بویمن لە کارمان و تەقەلامان ئەرا وەپشتسەرنان گرفت و ناکۆکیەیل، و ئەوەسا وەیەکەو کار ئەرا دیاریکردن مەوقەی هەڵوژاردن کەیمن.
دووارە وەخێرهاتندان کەم لە سلێمانی
فرە سوپاس.
