نێچیروان بارزانی لە ڤاتیکانەو: هەرێم کوردستان خوازێد مەسیحیەیل لە ماڵ و میلکان خوەیان بمینن
ئەوەیش دویای نیمەڕوو ئمڕوو هات مەوقەیگ چەوی کەفتە کاردیناڵ بیترۆ بارزانی سەرۆک وەزیرەیل ڤاتیکان، وەگورەی بەیاننامەیگ لە سەرۆکایەتی هەرێم کوردستان.
بەیاننامەگە وتیش: لە دیدارەگە باس رەوشەیل عراق وەشیوەی گشتی کریا، و هاڵ و خەوەر پیکاتەیل لە هەرێم کوردستان و عراق، وەتایبەت مەسیحیەیل و ناوچەیلیان، و رووشنایی خریا بان ئەو تەقەلایلە ک ئەرا مەنین مەسیحیەیل لە عراق و هەرێم کوردستان دریەن.
سەرۆک وەزیرەیل ڤاتیکان سوپاس و رێز خوەی نشان دا ئەرا رۆڵ سەرۆک نێچیروان بارزانی و تەقەلایلی ئەرا گردەوکردن لایەنەیل و چارەکردن گرفتەیل لە عراق و هەرێم کوردستان، و دووپات لە پاڵپشتیکردن تەواو ڤاتیکان ئەرا هەرێم کوردستان کرد.
بارولین دەسخوەشی لە وازکردن زانکۆی کاسۆلیکی لە هەرێم کوردستان کرد و هاوکاریکردن و پاڵپشتیکردن حکومەت هەرێم کوردستان ئەرا زانکۆەگە و فراوانکردنی، و باس سەردان پارەکەی ئەرا هەولێر وە سەرکەفتگ کرد، و باس وەیەکەوژیان ناو هەرێم کوردستان کرد ک جی دڵخوەشی و گەشبینیە.
لەلای خوەییش، نێچیروان بارزانی سەرۆک هەرێم کوردستان دووپات کرد ک هەرێم کوردستان خوازێد مەسیحیەیل لە ماڵ و میلکان خوەیان بمینن، و نشان ئامادەیی لەلایەن هەرێم کوردستان ئەرا دەسمیەتی ئەوانە دا ک خوازن گلەو بخوەن.
بارزانی داوای پاڵپشتیکردن لە ڤاتیکان کرد و گاڵداین یەکێتی ئەوروپا ئەرا جیوەجیکردن پڕۆژەیل ئاوەدانی لە ناوچەیل مەسیحیەیل لە هەرێم کوردستان و عراق.
پەیوەندیەیل هەولێر و بەغدا، و گفتوگۆکردن ئەرا چارەکردن گرفتەیل ناوبەینیان، و رەوشەیل ناوچەگە وەگشتی، باوەتەیل ناو ئەو دیدارە بوین.
