نێچیروان بارزانی دووپات لە گرنگی لەیەکڕەسینەوە و نووڕین هاوبەش لە وەڕیەوبردن عراق کەێد
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس سەردان دویایین سەرۆک هەرێم کوردستان ئەرا بەغداد و چەوکەفتنی وە وەرپرسەیل لە حکومەت فیدڕاڵی کریا، و کارکردن ئەرا قایمکردن پەیوەندیەبل ناوبەین هەولێر و بەغدا، و چارەکردن گرفتەیل لە بنەمای دەستوور و سیستەم فیدڕاڵی.
بەیاننامەگە وتیش: هەردوگ لایەنەگە دووپات لەبان گرنگی کار هاوبەش ناوبەین هەولێر و بەغدا و لایەنەیل سیاسی کردن، و هاوڕا بوین لە گرنگی پاڵپشتیکردن حکومەت نوو لە عراق، و دووپات کردن ک دەرفەت ئەرا چارەکردن گرفتەیل عراق و جیوەجیکردن بەرنامەی حکومەتی هەس.
هەردوگ لایەنەگە هەمیش دووپات لەبان گرنگی جیوەجیکردن رێککەفتن ناوبەین حکومەت فیدڕاڵی و حکومەت هەرێم کوردستان کردن ئەرا گونجانن رەوشەیل لە شنگال و گلەوداین ئاوارەیل ئەرای.
بارزانی دووپات لەبان گرنگی هەسی لەیەکڕەسینەوە و نووڕین هاوبەش ئەرا چوینیەتی وەڕیەوبردن وڵاتەگە و سامانەیلی و دابینکردن ئاسایش و ئارامی کرد.
هەمیش باس گرنگی مقەیتیکردن ناوچەیل سنووری و هەماهەنگی ناوبەین هەولێر و بەغدا لەی باوەتە کریا، و هەمەڕەنگی سەرچەوەیل وزە و هاندان بەرهەمهاوردن بیگانە لەناو عراق و هەرێم کوردستان و دووارە رێکخستن هیزەیل پیشمەرگە و پەیوەندیەیل عراق وەرد دەوڵەتەیل هاوسا.
