نێچیروان بارزانی دووپات لە گرنگی پشتگیریکردن کۆمەڵگای ناودەوڵەتی ئەرا عراق و هەرێم کوردستان کەێد
شەفەق نيوز- هەولێر
نێچیروان بارزانی سەرۆک هەرێم کوردستان، ئمڕوو دووشەممە، وەگەرد نوینەر نەتەوە یەکگرتگەیل و هەماهەنگکار نیشتەجبوی عراق غولام محمد ئیسحاق زەی، باس رەوشەیل سیاسی و ئەمنی لە عراق کرد، و کاریگەرەیل ژاوەژاو لە ناوچەگە.
ئەوەیش لە پیشوازیکردن بارزانی لە نوینەر نەتەوە یەکگرتگەیل و شاند یاوەری هات، کە باس چالاکیەیل نەتەوە یەکگرتگەیل لە عراق کریا، وەگورەی بەیاننامەیگ لەلایەن سەرۆکایەتی هەرێم کوردستان کە رەسیە ئاژانس شەفەق نیوز.
بارزانی دووپات لە گرنگی وەردەوامبوین پشتگیریکردن و دەسمیەتیەیل کۆمەڵگای ناودەوڵەتی ئەرا عراق و هەرێم کوردستان کرد، ئەرا پتەوکردن ئارامی و نواگیریکردن سەختیەیل، و ئافەرین لە ئامادەبوین و رۆڵ نەتەوە یەکگرتگەیل لە وڵات کرد.
لەلای خوەییش، ئیسحاق زەی سوپاس لە هاوکاری لایەنە پەیوەندیدارەیل لە هەرێم کوردستان وەرد نەتەوە یەکگرتگەیل کرد، و پابەندبوین ئەو ریخریاگ ناودەوڵەتیە نووەو کرد لە دەسمیەتیدان عراق و هەرێم کوردستان.
لە دیدارەگە باس رەوش گرژیەیل لە ناوچەگە کریا و کاریگەریەیل جەنگ، و دووپات لەبان چارەسەریەیل دیبلۆماسی کریا ئەرا رەسین وە چارەسەریەیل ئاشتەوایی ئەرا کێشەیل.
