نێچیروان بارزانی دووپات لەبان گرنگی مقیەتیکردن هیزەیل هاوپەیمانی و شاندەیل دیبلۆماسی لە عراق کەێد
لە بەیاننامەیگ کە لەلایەن سەرۆکایەتی هەرێم بڵاو کریایە، باس ئەوە کرد کە شەوەکی ئمڕوو، نێچیروان بارزانی سەرۆک هەرێم کوردستان پیشوازی لە مارشال سامی سامپسۆن، راوێژکار سەرۆک وەرگری بەریتانیا لە خوەرهەڵاتی ناوڕاس و باکوور ئەفریقا و شاندیگ سەربازی یاوەری کرد.
لە بەیاننامەگە وتیش: هەردوگلا لە گردەوبوینیگ باس دویاترین پیشهاتەیل جەنگ غەززە و ئەگەر و کاردانەوە چەوەڕیکریای کردن.
لەو چوارچیوە سەرۆک نێچیروان بارزانی دووپات کرد کە خراوبوین رەوشەگە رخیگ لەبان تەواو ناوچەگە دروس کەێد، هەر ئەرایە بایەسە عراق وە گشت شیوەیەک خوەی لە جەنگ دویرەو بخەێد، چوینکە جەنگ هویچ گیچەڵیگ چارەسەر نیەکەێد و ئەوەیش تەنیا ئاشتی چارەسەرە.
لەباوەت رەوش سیاسی عراق، هەردوگلا هاوڕابوین لەبان ئەوە کە بایەسە پارێزگاری لە بیوەیی عراق و ئارامی سیاسی و ئەمنی بکریەێد، و بایەسە گشت لایەنەیل وەرپرسیارانە رەفتار بکەن، هەرلیوا دووپات لەبان گرنگی مقیەتیکردن هیزەیل هاوپەیمانی ناودەوڵەتی و نوێنەرایەتییە دیپلۆماسییەیل عراق کرد لە جویرەیل هەڕەشە.
لە بەیاننامەگە وتیش: لە لاییگ ترەک گردەوبوینەگە نووڕین هەردوگلا هاوڕا بوین لەبان ئەوە کە هیمان تیرۆر رخ و هەڕەشەیگ راستەقینە لەبان سەقامگیری ئەمنی و ئاسایش عراق دروس کەێد و هەر ئەراوە عراق و هەرێم کوردستان هیمان خوازین وە پشتیوانی هاوپەیمان ناودەوڵەتی دیرن ئەرا نەهێشتن داعش تا هەمیشە.
لەی باوەتە بەڕێز سامپسۆن زوور لە پابەندبوین وەردەوامی بەریتانیا کرد، لە چوارچیوەی هاوپەیمانی ناودەوڵەتی، وە عراق و هەرێم کوردستان.
لە بەیاننامەگە هاتیە: رەوش ناوخوەی هەرێم کوردستان باسیگ ترەک بویە لەناو دیدارەگە، کە هەردوگلا گردەو کرد، وەگەرد باس و گردەوبوین ئەم دواییەی ناوەین پارتی و یەکێتی کە وە کار خاسیگ باسی کرد.
