نێچیروان بارزانی داوا لە لایەنەیل سیاسی کەێد بانە "پایتەخت دویەمیان" و دەسبکەنە گفتوگۆ
شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، باس لە نیگەرانی خوەی کرد وەرانوەر رەوشەیل سیاسی دویایین ک وڵاتەگە وەخوەی دوینێد، لە خود وەختەگە داوا لە گشت لایەنەیل سیاسی کرد خوەیان بگرن و دەسبکەنە گفتوگۆ راستەوخۆ ئەرا وەپشتسەرنان گرفتەیل، و دەرکردن عراق لەی رەوش ناسکە.
سەرۆک نێچیروان بارزانی لە بەیاننامیگ رەسیە ئاژانس شەفەق نیوز وت: وە نیگەرانی قویلیگ نووریمنە رەوشەیل سیاسی و ئەو نووەبویەیلە ک عراق وەخوەی دوینێد، وداوا لە لایەنەیل سیاسی کرد تا ئەو پەڕ خوەیان بگرن و بچنە ناو گفتوگۆ راستەوخۆ ئەرا چارەکردن گرفتەیل.
هەمیش وت: ئاڵووزکردن کارەیل وە شیوەیگ زیاتر لەسای ئی رەوشەیل ناسکە ئاشتەوایی کۆمەڵگا و ئاسایش و ئارامی لەی وڵاتە خەێدە وەر مەترسی.
سەرۆک هەرێم کوردستان وتیش: ئیمە ک لە وەختیگ رێز لە خوازین خوەینشاندان ئاشتەوایی جەماوەرەیل کەیمن، هەمیش دووپات لە گرنگی مقەیەتیکردن دام و دەزگایەیل دەوڵەت وئاسایش وژیان ودارایی هاووڵاتییەیل و فەرمانبەرەیل دەوڵەت کەیمن.
هەمیش وت: گەل عراق شایستەی ژیان و بانان ودویارووژیگ خاسترە، و ئەرک و وەرپرسایەتی هاوبەش ئەرا گشت هیز و لایەنەیلە خوەی وەیەکەو کارکردنە ئەرا دراوردن عراق لەی رەوش ناسک و رخبەرە.
نێچیروان بارزانی وتیش: هەرێم کوردستان، هەکاتی هەمیشە، ئەوەسا هەر بوودە بەشیگ لەی چارەسەریە، ئەراوە داوا لە لایەنەیل سیاسی پەیوەندیدار لە عراق کەیمن بانە هەولێر، پایتەخت دویەمیان، و دەسبکەنە گفتوگۆ وازیگ گردەوکەر ئەرا رەسین وە یەکڕەسینەوە و رێککەفتن لە بنەمای بەرژەوەنیەیل باڵای وڵاتەگە، ک هویچ گرفتیگ نییە چارەسەری وە گفتوگۆ نەکریەێد.
جی باسە ک لایەنگرەیل رەوت سەدر ئەرا دویەم جاریانە وە ماوەی ٧٢ ساعەت چینە ناو ناوچەی خەزرا و بینای پەرلەمان عراق، لە ناڕەزاییان لەبان کاندیدکردن محمد شیاع سوودانی لەلایەن چوارچیوەی هەماهەنگی ئەرا سەرۆکایەتی حکومەت فیدراڵی هاتگ.
