نێچیروان بارزانی داوا لە حزبەیل کەێد لەبان مەوقەی ئەنجامدان هەڵوژاردن لە هەرێم رێک بکەفن

شەفەق نیوز/ نێچیروان بارزانی سەرۆک هەرێم کوردستان، ئمڕوو شەممە، داوا لە حزبەیل کوردستانی کرد لەبان دیاریکردن مەوقەی ئەنجامدان هەڵوژاردن پەرلەمان لە هەرێم کوردستان ڕێک بکەفن.

ئەوەیش لە وتاریگ ئەرا رووژنامەوانەیل لە دویای بەشداریکردنی لە پرسەی قوربانیەیل رویداو تەقیان ئەمار گازەگە لە شار سلێمانی هات، و لە پەراویز سەردان زەخمدارەیل لە خەسەخانەی شار.

سەرۆک نێچیروان بارزانی ئەرا رووژنامەنویسەیل وت: جویر سەرۆک هەرێم کوردستان و لەبنەمای ئەو ئەرکە لەبان گەردنی، پەیامیگ ئەرا سەرۆکایەتی پەرلەمان کوردستان لە باوەت هەڵوژاردن کل کردم، و باس ئومیدی کرد ک حزبەیل لەبان ئی باوەتە ڕێک بکەفن.

وتیش: تەمەن پەرلەمان ئەرا یەک ساڵ درویژەو کریا، و بیگومان لە ماوەی ئی ساڵە بایەتە هەڵوژاردن لە هەرێم کوردستان ئەنجام بیریەێد.