نێچیروان بارزانی دەسنیشان سەرکەفتن گەورەیگ کەێد وەگەرد هەڵوژاردن هەرێم کوردستان هات
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، دووپات کرد کە ئەنجامدان هەڵوژاردن پەرلەمان کوردستان وەشیوەیگ ئاشتیانە "ئارام و شارستانی"، وە سەرکەفتن گەورەیگ دانریەێد کە جی رێزگردن جەهانە.
بارزانی وەگورەی بەیاننامەیگ رەسیە ئاژانس شەفەق نیوز پیرووزبایی لە گشت گەل کوردستان وە گشت پیکاتەیلی وە گەرمترین پیرووزبایی کرد ئەرا تەواوبوین و سەرکەفتن هەڵوژاردن پەرلەمان کوردستان، و دووپات کرد کە گامیگ گرنگ بوی ئەرا قایمکردن ری دیموکراتی ئەرا گەل کوردستان.
وتیش: هاوکاریکردن گشت لایەنەیل ئەرا سەرکەفتن دەنگدان و جیوەجیکردنی تا وە ئاسوودەیی وەڕیەو بچوود، کاریگ جی شانازی و ڕێزگردنە، کە گەل کوردستان خوەی لەی ئەنجامە سەرکەفتگە، وتیش؛ هەڵوژاردن نووەوکردنە ئەرا شەرعیەت دامەزراوەیل هەرێم کوردستان و باسکردن وە ئازادی لە را و دەنگەیل خوەدان ئەرا هەڵوژاردن نوینەرەیلدان لە پەرلەمان.
وتیش: رووحیەت رکابەری ئاشتەوایی و بەشداریکردن فراوان خەڵک لە هەڵمەت هەڵوژاردن و دەنگدان، رکداری گەل کوردستان چەسپنێد لەبان قایمکردن بنەمایل دیموکراتی و ماف خوەی لەو بڕیارەیلە کە پەیوەندی وە چارەنویس و بانانی دیرن، کە بەڵگەس لەبان ژیان و رەسین بەر رووشنهویری دیموکراتی گەل کوردستان.
نێچیروان بارزانی سوپاس فرەی ئەرا گەل کوردستان و هیزەیل ئەمنی و کۆمسیۆن باڵای سەروەخوەی هەڵوژاردن و حکومەت فیدڕاڵی و گشت لایەنەیل پەیوەندیدار عراقی، و تیم نەتەوە یەکگرتگەیل (يونامي) و گشت لایەنەیل پیشکەش کرد لەبان وەڕیەوبردن و سەرکەفتن هەڵوژاردن، کە پابەندی و هاوکاری ئیوە کلیل ئی سەرکەفتنە بوی، سوپای ئەرا گشتی.
سەرۆک هەرێم کوردستان وتیش: ئەنجامدان هەڵوژاردن وە شیوەی ئاشتەوایی و شارستانی سەرکەفتن گەورەس جی رێزگردن جەهانە، و ئەوەگ ئی سەرکەفتنە تەواو کەێد و گەل کوردستان چەوەڕیی کەێد ئەوەسە کە لایەنەیل سیاسی دویای واژووکردن ئەنجامەیل کۆتایی هەڵوژاردن، روی وەرەو دروسکردن حکومەت لە زویترین وەخت بکەن.
بارزانی وتیش: دروسکردن حکومەتیگ تاواندار ئەرا بتەوکردن ئارامی و بیناکردن ئابووریگ هازدارتر و وەجیهاوردن مافەیلیگ زیاتر، گرنگییگ فرەس لەی قۆناغە ئەرا نواگیریکردن سەختیەیل ئیسە و بیناکردن بانان هاوبەش، و ئەوەیش داشتن رووحیەت یەکگردن و هاوکاری ناوەین گشت لایەنەیل سیاسی و پیکاتەیل خوازێد.
