نێچیروان بارزانی بانگهێشت جیوەجی رێککەفتن نەفت و مووچە وە شیوەی دەستووری کەێد: دەسەڵاتداری هەولێر وەبان بەغداد یان پێچەوانەگەی نیە
شەفەق نیوز - سلێمانی
سەرۆک هەرێم کوردستان نێچیروان بارزانی، ئمڕوو پەنجشەممە، بانگهێشت جیوەجی رێککەفتنە سیاسییەیل کە لە ناوەین هەولێر و بەغدادە لەبان باوەتەیل نەفت و مووچە و پشک هەرێم لە بودجەی دارایی وڵات کریانە، وەپای چوارچمگ دەستوورییەیل کەێد، و دووپات کەێد ئامانج دەسەڵاتداری هەولێر وەبان بەغداد یا پێچەوانەگەی نیە، بڵکم سەرکەفتن عراق و دەوڵەتە لە ری جیوەجی دەستوور و جیگیرکردن ئارامی.
سەرۆک نێچیروان بارزانی، لە وتەیگ کە لە وەخت وازکردن کارەیل لوتکەی ئابووریی ئەوزەڵوەپیدان و وەبەرهێنان لە پارێزگای سلێمانی پێشکەشی کەێد، وت: "ئیمە ئمڕوو لە گشت عراق هەوەجە کەێد لە خۆمان بپرسین: ئایا دەستوورە کە گوزەشتە لەبانی رێککەفتبووین جیوەجی کریاگە؟ جواو: نەخێر، وە گشت هویردەکاریەیل و وە تەواوی جیوەجی نەکریاس"، و ئاشکرایکرد "دەستوور داواکارییگ کوردی یا ئیمتیازیگ هەرێم نیە، بڵکم گرێبەست گشتگیرە لە ناوەین عراقییەیل و پارێزەر مافەیل گشت پێکهاتەیلە".
وتیش؛ "جیوەجی دەستوور نیەوێد ئەرا بەرژەوەنی پێکهاتەیگ بوود وە پێکهاتەیگ تر، بڵکم ئەرا گشت عراقییەیلە کە دەنگ وەبانی دایە، ئەرا بەهێزکردن پێکەوەژیان و هاوبەشی"، و دیاریکد "جیوەجیکردن دەستوور متمانە وە دەوڵەت گلەودەێد، و نیەتوام هویچ عراقییگ ئەرا پاراستن هەبوین خوەی پەنا وەر هێز بوەد، بڵکم عراقیگ تواین گشتی پابەن دەستوور بوون؛ ئەو دەستوورەی ماف گشت کوڕ و دویەتەیل خوەیی پارێزەێد".
سەرۆکی هەرێم وتیش؛ "سیستەم فیدراڵی سەرچەوەی هاز عراقە و جیوەجیکردنی وە شێوەی دروس، وڵات کەێدە دەوڵەتیگ بەهێز لە ناوچەگە؛ چوینکە دەستوور کلیل سەرەکی چارەسەرکردن قەیرانەیل و گیچەڵەیل وڵاتە"، و دووپات کەێد "هەرێم کوردستان بەشیگ لە عراقی فیدراڵیە، بەغداد قووڵایییگ ئەرا ئیمەس و بەشیگ جیا نەکریاگە ئاسایش و سەقامگیری هەرێمە، هەمیش هەوەجە کەێد کوردستان جویر هێزیگ ئەرا عراق بدوینریەێد".
نێچیروان بارزانی دووپات کرد "نیەتوەنین بەردەوام بوین لە وڵکردن ناکۆکییە درویژخایەنەیل لە ناوەین هەولێر و بەغداد بی چارەسەر، مێزی گفتوگوو هەمیشە وازە ئەرا یەکلاکردنیان وەپای ئەو رێککەفتنە گەپە کە هەردوگ لا گردەوکەێد، کە ئەوە دەستوورە"، و ئاشکرایکرد "بابەتەیل بودجەی دارایی و مووچە و نەفت هەوەجە وە چارەسەریگ دەستووری کەێد کە ماف گشتی دابین کەێد".
سەرۆک وەردەوام بوی و وت: "ئامانج ئیمە دەسەڵاتداری هەولێر وەبان بەغداد یا پیچەوانەگەی نیە، بڵکم ئامانجمان ئەوەس عراق و دەستوور و دەوڵەت سەرکەفتی بن، لەو وەخت هەرێم کوردستان لە چوارچمگ عراقیگ یەکگرتگ بەهێزەو ئەوی"، و دیاریکرد "مەردم هەرێم چەوەڕێ هێزە سیاسییەیلە کە ناکۆکییەیل وە یەکگرتگی و یەکڕیزی چارەسەر کەن، چوینکە خاسترکردن ژیان هاووڵاتییەیل و وەبەرهێنەرەیل بەسیاگە وە یەکگردن و هاوبەشی".
