نێچیروان بارزانی باس نەفت و مووچە و هەڵوژاردن کەێد
سەرۆک بارزانی لە بەیاننامەیگ رەسیە ئاژانس شەفەق نیوز وت: “لە سەردانەگەم ئەرا بەغدا، چەن گردەوبوینیگ وەرد سەرۆک حکومەت و هاوپەیمانی ئیدارەی دەوڵەت و چوارچیوەی هەماهەنگی ئەنجامدام”، وتیش: “دیدارەیل وە گشتی لە چوارچیوەی ئەوە پەیوەندییەیل بانان ناوەین هەرێم کوردستان و بەغدا بوین و تەقەلای داناین میکانیزمیگ تا بتوانیمن وەردەوام بویمن لە ئەنجامدان ئی گردەوبوینەیلە ئەرا ئەوە کە کێشەیل ئیسە لە یەک شوین تاوتوێ بکریەن و چارەسەر پەیا بوود”.
بارزانی وتیش: "پرس مووچە پرسیگ بنەڕەتییە ئەرا حکوومەت هەرێم کوردستان، و ئەو ڕێککەفتنە لە ناوەین سەرۆک حکوومەت هەرێم و سەرۆک حکوومەت فیدراڵی کریاس، سەرەتایگ فرە خاسە و ئومیدەواریمن وەردەوام بوون".
سەرۆک بارزانی هەمیش وت: باس پرس نەفتیش کردیمن و بیگومان جویر هەرێم کوردستانیش لە نووڕیمان بایەسە هەناردەکردن نەفت دەسوەپی بکەێد چوینکە ئی باوەتە زیان فرەیگ وە عراق و هەرێم کوردستان رەسانیە و تا ئیسە زەردەیگ فرە وەبان بوودجەی عراق هاوردیە و زیاتر لە هەفت ملیار دۆلار لەکیسی چگە”.
وتیش؛ بیگومان ئی باوەتە باسی کریا، بەڵام شاندیگ زیاتر حکومەت هەرێم کوردستان خوازێد تا سەردان بەغدا بکەن و زیاتر لەبان ئی باوەتە قسە بکەن، ئومید خوازیمن بڕەسنە ئەنجامیگ.
لەباوت ئەنجامدان هەڵوژاردن هەرێم کوردستان لە مەوقەی خوەی، نێچیروان بارزانی وت: “ئەوە وەرپرسیارێتی منە جویر سەرۆک هەرێم کوردستان، مەوقەی ئەنجامدان هەڵوژاردن دیاری کردیمنە و هویچ ئاڵشتکارییگ لەی باوەتە نییە، ببگومان یە پرس سیاسییە و بایەسە گشت هیزە سیاسییەیل قسە لەلی بکەن و لەوەوە بڕەسنە لەیەکفامستن”.
دویەکە شەممە، نێچیروان بارزانی، سەرۆک هەرێم کوردستان رەسیە بەغدای پایتەخت، لەورا بەشداری هەردووگ گردەوبوین چوارچیوەی هەماهەنگی لایەنە شیعەیل و گردەوبوین ئاسایی هاوپەیمانی ئیدارەی دەوڵەتی کرد، کە تا دیرەخوەتیگ لە شەو وەردەوام بوی.
